'Zona Photobook' zikloa hasiko da ostegun honetan Gasteizen

Zona Photobook argazki-liburuari buruzko zikloaren lehenengo edizioa hasiko da Gasteizko Montehermoso Kulturunean ostegun honetan, irailaren 11n, David Salcedo argazkilariak eskainiko duen hitzaldiarekin. Narratiba bisualaz hitz egingo du, bere ustez argazki-liburu bat zer den azalduko du, eta Ocho puntas izeneko argitalpena aurkeztuko du.

Gasteizko Udaletik jakinarazi dutenez, ostiralean, irailaren 12an, Salcedok berak 'Hariak eta argiak' argazki-liburuak dastatzeko kluba inauguratuko du, esperimentu txiki batekin.

Kluba hilabete bakoitzeko lehen asteazkenean bilduko da urritik aurrera Montehermoson, Sara Berasaluce eta Yone Estivariz argazkilari gasteiztarren eskutik. Lehen saioak formatu handia izango du eta, bertan, Salcedok berak aukeratutako hainbat fotoliburu irakurriko ditu, eta kluba zer izango den azalduko du. Klubak 10-12 lagunentzako formatu txikia izango du.

'Zona Photobook' zikloak familientzako tailerrarekin jarraituko du urriaren 4an, Nagore Legarreta argazkilariaren eskutik. Doako tailer honetan, 8 eta 12 urte bitarteko neska-mutilek irudien lengoaiak nola funtzionatzen duen ikasiko dute, argazkiak aterako dituzte eta beren fanzinea eskuz egingo dute, heldu batekin batera. Izena emateko epea zabalik dago.

Gainera, urriaren 18an, Sara Berasalucek eta Yone Estivarizek 12 lagunentzako hitzaldi-tailerra eskaini eta 'Mahai bueltan: bazkalostea espazio partekatu gisa' izeneko proiektuaren berri emango dute. Ikerketa editorialeko tresnak aztertuko dituzte prozesuan dagoen erakusketa baten inguruan.

Abenduaren 22an eta 23an, arratsaldez, 'Zona Photobook' gunean tailer didaktiko bat egingo da nahi duten guztientzat, Nerea Lekuona gasteiztarrarekin. Narratiba bisualaz hitz egingo da beste ikuspegi batetik: argazkiekin collage bat egingo da bizia emateko, papera, guraizeak eta eskuak erabiliz, eta bideo txikiak sortuko dira.

BESTE DATU BATZUK

Era berean, Gasteizko hainbat argazkilarik egindako eta David Salcedok gidatutako erakusketa kolektiboa egongo da ikusgai azaroaren 21etik abenduaren 14ra bitarte Montehermosoko Jovellanos aretoan.

'Eraztun berdea, hurbilketa bat eta narratiba posible bat' izenburupean, artisten sorkuntza prozesua ezagutzeko aukera egongo da eta, fanzine formatua oinarri hartuta, istorioak kontatzeko garaian irudien arteko loturek duten garrantzia ikusi ahal izango da.