'Udan zinea zure auzoan' programak zortzi saio eskainiko ditu Bilboko auzoetan uztailaren 9tik abuztuaren 7ra

Bilboko Udalak aire zabaleko zortzi zinema saio eskainiko ditu hiriko hainbat auzotan 'Udan zinea zure auzoan' ekimenaren baitan. Egitaraua uztailaren 9tik abuztuaren 7ra egingo da, eta, film luze eta film labur bana proiektatzeaz gain, musika emanaldi bat ere izango da.

Bilboko Udaletik jakinarazi dutenez, Estibaliz Urresola, Paul Urkijo, Pablo Berger eta Koldo Almandoz euskal zinemagileen lanak izango dira ikusgai, besteak beste.

Aurtengo udarako aukeraketak barne hartzen ditu ekoizpen berriak, genero desberdinetako klasikoren bat, Euskal Herriko eta Europako zinema eta ekoizpen komertzialagoak. Horrela,

Saio guztiak kontzertu batekin hasiko dira 19:00etan; jarraian film labur bat proiektatuko da, eta, ondoren, 21:00etan, film luze bat. Lau film gaztelaniaz emango dira, bi euskaraz, beste bat bi hizkuntzetan eta beste bat elkarrizketarik gabe.

Emanaldietarako sarrera librea eta doakoa izango da lekuak bete arte. Eserlekuak erreserbatuko dira premia bereziak dituzten pertsonentzat.

GASTEIZ

Bestalde, Gasteizko Montehermoso Kulturuneak Abel Azcona arte garaikidearen "nazioarteko ahotsik erradikalenetako eta konprometituenetako baten" 'Familiaren Monumentua' erakusketa irekiko du Ur Biltegian. Dani Castillejoren kuratoria duen erakusketak Azconaren lan eta performance multzo esanguratsu bat biltzen du.

Artelan horiek artistaren ibilbidea zehaztu dute azken urteetan, eta "erabat autobiografikoa, politikoa eta erraietakoa den lan corpusa" osatzen dute, aurkezpenean azaldu dutenez.

'La savia', 'Empatía y prostitución', 'Exégesis de la madre' edo 'Volver al padre' moduko lanekin, erakusketak Azconaren lana zeharkatu duten funtsezko ardatzak jorratzen ditu, hal nola haurtzaroa, gorputza, egiturazko indarkeria, trauma, identitatea eta erresistentzia.