Gazte Hitzak literatur lehiaketaren sariak banatuko dira larunbatean Gasteizko Montehermoson

Gasteizko Udalak sustaturiko 12 eta 30 urte bitarteko gazteentzako Gazte Hitzak literatur lehiaketaren sari banaketa ekitaldia egingo da larunbatean, maiatzaren 31n, Montehermoso Kulturunean.

Ekitaldia 12:00etan hasiko da, eta 2025eko edizioan aurkeztutako ipuin eta nanokontakizun onenak sarituko dira eta hautatutako testuen zati bat irakurriko da, Gasteizko Udaletik jakinarazi dutenez.

Gazteriako eta Kulturako udal zerbitzuek sustatu dute lehiaketa, eta IDArte Euskal Herriko Arte eta Goi Mailako Diseinu Eskolaren laguntza eta Laboral Kutxaren babesa izan ditu.

Alvaconv gazteak bere rap abestietako batzuk interpretatuko ditu eta Xabier Olaso idazlea eta Dorleta Kortazar narratzailea ere izango dira sariak emateko ekitaldian bertan.

Hain zuzen, Olaso eta Kortazar lehiaketako epaimahaikideak izan dira, eta ipuinen kategorian irabazleei eskainitako mentoretzaz arduratu dira. Horrela, apirilean eta maiatzean zehar, proposamenak hobetzen lagundu diete irabazleei, eta performance formatuan aurkeztuko dituzte galan.

Era berean, saritutako nanokontakizunak eta ipuinak IDarteko ikasleek ilustratu dituzte, argitalpen batean biltzeko eta asteburu honetan bertan Montehermosoko klaustroan ikusgai egongo den erakusketa ibiltari baten parte izateko.

Erakusketa El Pilar gizarte etxean ikusgai egongo da irailaren 17tik 29ra, Salburukoan irailaren 30etik urriaren 9ra, Zabalganakoan urriaren 10etik 20ra, eta Labe Gazte Laborategian azaroaren 19tik abenduaren 19ra.

Ana Lopez de Uralde Gazteriako zinegotziak eta Sonia Diaz de Corcuera Kulturakoak herritarrei dei egin diete larunbateko sari banaketara joateko, "saritutako lanak ezagutu eta parte hartzaileen dedikazioa eta sorkuntza lanak aintzatetsi ditzaten".