Gaur hasi da espaloiak konpontzeko kanpaina, Gasteizko Udaleko Mugikortasun eta Espazio Publikoko Sailak sustatua. Horregatik, iragarri dutenez, datozen asteetan Gasteizko hogei kaletan lan egingo da. Lan honetarako aurrekontua 750.000 eurokoa da.
Hala, Raimundo Ruiz de Escudero Mugikortasun eta Espazio Publikoko zinegotziak azaldu duenez, kale guztiak mantentzeko ahalegina bikoiztu egin dute.
Bere hitzetan, “gure kaleak eta plazak mantendu behar direlako egingo da inbertsio handi hori. Espaloietako esku-hartzea diseinatzeko garaian, oso kontuan izan ditugu herritarren ekarpenak eta eskaerak, bai Gasteizko auzoetatik, auzo-elkarteen bitartez, erregistratu dituztenak, bai herritarrek Gasteizko Agendaren partaidetza-prozesuaren bidez erregistratu dituztenak”.
Mugikortasunaren eta Espazio Publikoaren Sailak 8.000 metro karratuko azaleran aurreikusten du izango direla jarduerak, zehazki Ariznabarra auzoan: Gaztelako Atean, iparraldeko espaloian; Etxezarra, Kexaako Gaztelua, Gebarako Gaztelua eta Fontetxako Gaztelua kaleetan eta Teodoro Gonzalez de Zarate kalean. Kexaako Gaztelua kalean egin dira lehenengo lanak. "Amurrio kalearen, Gasteizko Taldearen kalearen eta Nafarroako Errege-erreginen kalearen arteko eremuan ere izango dira jarduerak; baita Pablo Xérica kalean, Salvador García del Diestro kalean eta Geltoki plazatxoan ere", ondorioztatu dute gaur Gasteizko Udaletik.
Azkenik, aipatu dutenez, "espaloien egoera txarraren arrazoi nagusiak hauek dira: denboraren joana eta espaloien erabilera intentsiboa, ibilgailu astunen joan-etorria eremu horietan eta batzuetan zoladura altxatzen duten zuhaitzen sustraiak".
