Enplegu ez-finantzarioak 38.214 milioi eurotan kokatu da

Euskal AEko Administrazio Publikoek (Euskal Administrazioak, Estatuko Administrazio lurralderatua eta Gizarte Segurantza lurralderatua) 3.337 milioi euroko defizita izan zuten, hau da, 2022an baino 365 milioi euro gehiago, Eustatek Europar Batasuneko Nazio eta Eskualde Kontuen Europako Sistemak (SEC-2010) ezarritako irizpideen arabera landutako datuen arabera. 

2023an kudeatutako baliabide ez-finantzarioak 34.878 milioi eurora iritsi ziren, guztira, 2022an baino % 6,7 gehiago; bestalde, enplegu ez-finantzarioak % 7,1 hazi ziren, 38.214 milioi eurora arte. Emaitza 3.337 milioi euroko finantzaketa-beharra izan zen, aurreko urtean baino % 12,3 handiagoa.

Baliabide ez-finantzarioen xehetasunak bilakaera desberdinak erakusten ditu. Hiru garrantzitsuenen artean (guztizkoaren % 88,7 hartzen dute), Gizarte-kotizazioak daude. Horrek jarraitzen du izaten pisurik handieneko partida (guztizkoaren % 32,2), eta % 8,0ko hazkundea izan zuen, hau da, 829 milioi euro gehiago, eta 2023an 11.214 milioi eurora iritsi zen. Errentaren, ondarearen eta abarren gaineko zergak baliabideen % 27,5 izan ziren, eta % 10,8 hazi ziren, 9.588 milioi eurora iritsi arte. Aitzitik, Produkzioaren eta inportazioen gaineko zergei dagokien zenbatekoa (baliabideen % 29,1) % 0,1 jaitsi zen, eta 10.136 milioikoa izan zen. Murrizketa hori, batez ere, BEZaren eta Ondare-eskualdaketen eta Egintza juridiko dokumentatuen gaineko zergaren diru-sarreren jaitsierak eragin zuen.

Gainerako errubriken bilakaera positiboa izan zen, oro har. Zehazki, Merkatu-produkzioa eta Beste produkzio batzuengatiko ordainketak (baliabideen % 5,8) atalari dagozkion diru-sarreren guztizkoa % 3,9 handitu zen. Bestelako transferentzia arruntak (baliabideen % 3,0) % 1,7 handitu ziren. Jabetza-errentek (guztizkoaren % 1,4) % 117,7ko hazkundea izan zuten, batez ere interesengatiko diru-sarreren igoeraren ondorioz, horiek 497 milioi eurora iritsi baitziren 2023an. Kapitalaren gaineko zergak % 16,0 hazi ziren eta 229 milioi eurotan kokatu ziren. Azkenik, gainerako kapital-transferentziak (Inbertsiorako laguntzak eta Bestelako kapital-transferentziak) % 27 handitu ziren guztira, 2023an 140 milioi eurotara iritsiz.