"Zaila izan arren, etorkizunean abesten eta konposatzen ikusten dut nire burua"

"Oso pozik nago Oihanederren abesteagatik. Hain zuzen, Gasteizen abesten dudan lehen aldia da, eta oso pozik nago; unea iristeko eta agertokira igo ahal izateko irrikaz eta gogotsu nago gasteiztarrei eta arabarrei kantatzeko", aitortu du kontzertua baino ordu batzuk lehenago. Gazte honek kontzertua eskainiko du gaur, Egin Leku! deialdiaren irabazleetako bat izan ondoren. Deialdi honen bidez, euskarazko herri-sorkuntzari ateak zabaldu nahi zaizkio eta irabazleek, artista berriek, Oihaneder Euskararen Etxean jotzeko aukera dute. Horrela, beren musika-ibilbidea hasten ari diren musikariei leku bat eskaintzen diete ezagutzera emateko.

Azken edizio honetan, Jon Basaguren, Miren Narbaiza (Mice) eta Ander Sevilla musikariek osatutako epaimahaiak sei kantari aukeratu zituzten, besteak beste Lorea Zulaika. "Lehiaketan izena eman nuen, konfinamenduan bost abesti sortu eta bosten maketa egin nuelako. Oihanederreko lehiaketaren berri izan nuenean ez nuen bi alditan pentsatu eta izena ematea erabaki nuen. Hala ere, ez dakit, ez nuen pentsatu irabaz nezakeen ala ez, eta ilusio handia egin zidan irabazi nuela jakin nuenean. Mezu bat bidali zidaten eta egunkarietan ere irakurri nuen irabazi nuela. A ze poza", gogoratzen du. Harrezkeroztik, mimoz errepasatzen ditu gaur arratsaldean joko dituen abestiak, eta, batez ere, irrikaz itxaroten du Gasteizko jendearengana iritsi eta ezagutaraztea, gaurko hitzordua lurralde honetan izan nahi dituen kantu ugarietako lehena izan dadin. "Askotan kantatzen dut gaztetxeetan, eta badakit Gasteizen ere hori eramaten dela. Nork daki, niri asko gustatuko litzaidake Arabara maizago joatea eta han ere abestu ahal izatea, deitzen didaten lekuetara noa eta".

Lorea Zulaika Ziortza-Bolibarren jaio zen 1996an. Oso gazte hasi zen bakarka eta lagunekin kontzertu akustikoak ematen. 13 urte besterik ez zituen gitarrarekin lagunekin kontzertuak eskaintzen hasi zenean. Garai hartan bertan sortu zuen bere musika banda, Azalera izenekoa. Baina duela bi urte talde horretako kide bakoitzak bakarka hasi zuen bere ibilbidea, eta Azalera taldea desegin egin zen.

Orduz geroztik, Loreak bakarka jarraitu du, bere kantak sortuz eta konposatuz. Horietako batzuk beren esperientzietatik sortzen dira, eta beste batzuetan, aldiz, eguneroko bizitzan gertatzen diren gizarte-egoerei buruz gogoeta egitera bultzatzen dute. "Batzuetan bai konposatzen dudala nire esperientzietatik sortzen diren abestiak. Baina ez beti. Gizarteko bidegabekeriak ere kantatzen ditut, edo herritarrei gogoeta egitera gonbidatzen ditut. Film batean oinarrituta abesti bat ere sortu nuen", dio.

Bere ametsik hurbilenetako bat musika-banda bat sortzea da, eta, hala, bakarkako bidearekin amaitzea. Hain zuzen, bere talde berriko kideekin elkartu da, baina horietako bat Gipuzkoakoa da, eta gaur egungo pandemiak eta osasun egoerak eragotzi egiten dute elkarrekin saioak egiteko elkartzea. "Gaur egungo murrizketek elkartzea eragozten digute, baina taldea posible denean sortzeko asmoa daukagu, hala ere, ez dugu presarik", dio. Musikatik bizitzea du amets urrunen artean. "Zaila da musikatik bizitzea, baina etorkizunean pentsatzen badut abesten eta konposatzen ikusten dut nire burua, ez dut hau alde batera utziko".

Lorea Zulaika Ziortza-Bolibarren jaio zen 1996an. Oso gazte hasi zen bakarka eta lagunekin kontzertu akustikoak ematen

Ondoren, bere hainbat abesti sortu zituen eta musikarekin lotutako proiektu txikietan parte hartu zuen