Arabako Foru Aldundia Double Helix Venture Fund funtsean sartu da lurraldean biozientziak bultzatzeko

Arabako Foru Aldundiak Double Helix Venture Fund delakoan parte hartu du. Bioteknologian eta healthtechean espezializatutako Europako arrisku-kapitaleko funtsa da. Foru-erakundearen ekarpena 300.000 eurokoa da, eta biozientzien ekosistema babesteko foru-estrategiaren barruan dago, nodoaren hedapenarekin, pizgarri fiskalekin eta enpresak finantzatzeko beste tresna batzuekin batera.

Saray Zarate Ekonomiaren Garapen eta Berrikuntzako foru diputatuak azpimarratu duenez, "operazio honek biozientzietarako dugun ibilbide-orria indartzen du eta kapital espezializatua bermatzen die ahalmen handia duten Arabako enpresei. Akordioak Araban kokatutako konpainietan gutxienez 300.000 euro inbertitzeko konpromisoa jasotzen du, lurraldean hazkundearen eta enplegu kualifikatuaren palankak aktibatuz ".

Double Helix Venture Fund Balore Merkatuaren Batzorde Nazionalak onartutako inbertsio-funtsa da, eta 10 milioi euroko helburuko kapitala du. Bioteknologiaren eta osasunaren arloko enpresei laguntzea du helburu, bereziki proiektu sendoak eta hazteko potentzialak dituztenei. Funtsak 500.000 eta 1.000.000 euro arteko inbertsioak egiten ditu enpresa bakoitzeko, eta ekarpen handiagoa egiteko aukera dago ondorengo faseetan. Bere interes-eremuak honako hauek dira: diagnostiko medikoa, prebentzio-osasuna, medikuntza pertsonalizatua, osasunerako datuen eta softwarearen erabilera, bizitza-luzetasuna eta ongizatea hobetzeko tresna zientifikoak eta teknologiak. Ez du inbertitzen sendagai berrien garapenean, osasunari aplikatutako soluzio teknologikoetan baizik.

Arabako lehen inbertsioa: Baigene

Akordioaren ondorioz, Baigene izango da funtsetik inbertsioa jasoko duen lehen enpresa arabarra. Arabako Parke Teknologikoan (Miñao) dagoen konpainia bat da, Genetic Fitness-en espezializatua. Genetika eta bioteknologia aplikatzen ditu, errendimendu fisikoa eta osasun pertsonalizatua hobetzeko. Bere jarduera bioteknologiako ikerketa eta garapen esperimentalean oinarritzen da, analisi genetikoa, kirolaren zientzia eta teknologia konbinatuz, bere ongizatea optimizatu nahi duten kirolari eta pertsonei irtenbide berritzaileak eskaintzeko.

Baigene Aldundiak bultzatu nahi dituen proiektuen adibide bat da: Araban jaiotzen diren enpresak, oinarri zientifiko sendoarekin, teknologia propioarekin eta hazten ari diren merkatuetara bideratuta. Double Helixen laguntzarekin, konpainiak bere garapena bizkortu, lantaldea handitu eta nazioarteko presentzia indartu ahal izango du, Araba biozientzietako erreferentziazko lurralde gisa sendotuz.