Arabako Aldundiak Europako Arkeologia Jardunaldiak egingo ditu ekainaren 14an eta 15ean

Arabako Foru Aldundiko Museo eta Arkeologia Zerbitzuak Europako Arkeologia Jardunaldiak antolatu ditu ekainaren 14rako eta 15erako, eta jende guztiarentzako doako jarduerak eta tailerrak eskainiko ditu.

Modu honetan, foru erakundeak bat egin du aurten ere Europako Arkeologia Jardunaldiekin. Frantziatik sustatu zuten ekimena 2010ean, eta Europako Kontseiluaren babesa du, 20 herrialde baino gehiagotan arkeologia herritarrei hurbiltzeko asmoz.

Arabako Foru Aldundiak jakinarazi duenez, aktiboki parte hartzen du ekitaldi horretan 2019tik, eta urtero ekaineko hirugarren asteburuan "iraganeko altxorrak ezagutzeko gonbidapena" egiten du, jarduera ireki, original eta parte hartzaileen bidez.

HELBURUA

Jardunaldien helburua da jendeari aukera ematea ondare arkeologikoaren aberastasuna, ondarea ikusarazten duten prozesuak eta ondarea ikertzen, kontserbatzen eta hedatzen duten profesionalen lana ezagutzeko. Gainera, ondarea babestu beharraren inguruko kontzientzia sustatu nahi da, eta arkeologiaren eremua publiko berriei zabaldu.

Aurten, Arabako Aldundiko Museo eta Arkeologia Zerbitzuak programazio berezia antolatu du ekainaren 14rako eta 15erako. Horrela, zeramika tailerra izango da BIBAT Arabako Arkeologia Museoan, eta bisita gidatuak antolatu dira Iruña Veleiako aztarnategira eta Kuartangoko trikuharrietara.

Foru erakundeak herritarrak animatu ditu lurraldeko arkeologia ondarea eta haren balio kultural, historiko eta sozial izugarria hurbiletik eta modu atseginean ezagutzera eta jardunaldiotan parte hartzera.