Etxebidek 109.783 etxebizitza eskatzaile ditu, 2025ean baino %5,3 gehiago

Euskal Autonomia Erkidegoan (EAE) etxebizitza eskuratzeko eskaera egin duten 109.783 bizikidetza unitate zenbatu ditu Etxebidek 2026ko apirilaren 1ean, eta horrela, guztizko eskaria %5,3 igo da urteko lehen hiruhilekoan 2025eko azkenaren aldean. Eskaera guztietatik, 85.286 alokairu erregimenean izena emanda daude, eta 24.497 erosketa erregimenean, Eusko Jaurlaritzako Etxebizitza eta Hiri Agenda Sailak jakinarazi duenez.

Etxebizitzaren Euskal Behatokiak zabaldutako datuen arabera, EAEko bizitegi unearen argazki garbia erakusten dute: etxebizitza eskuragarria eskuratzeko beharra alokairuan kontzentratzen da nagusiki, hiri izaera nabarmena du eta hiriburuetan eta udalerri handienetan kokatzen da bereziki. Etxebiden izena ematen duten hamar pertsonatik ia zortzik alokairuko etxebizitza eskatzen dute.

Lurraldeka, Bizkaiak 58.131 eskatzaile ditu, EAEko eskatzaile guztien %53; Gipuzkoak 32.211 ditu (%29,3), eta Arabak 19.441 (%17,7). Urteko lehen hiruhilekoan, 2025eko laugarren hiruhilekoarekin alderatuta, eskaeraren hazkunderik handiena Gipuzkoan izan da (%12,8); Bizkaian eta Araban, berriz, eskaera %2,3 eta %2,5 igo da, hurrenez hurren. Hiru lurraldeetan alokairu eskaera da nagusi, baina maila ezberdinean: Araban eskariaren %88 da alokairurako, Bizkaian %77,9 eta Gipuzkoan %71,1.

Era berean, EAEko hiru hiriburuek Etxebiden izena emandako kopuru osoaren zati handi bat biltzen dute: Bilbon 32.093 eskatzaile daude, Gasteizen 18.604 eta Donostian 15.955.

Bizkaian, Etxebidek 58.131 eskatzaile erregistratu ditu; horietatik 45.278k alokairuko etxebizitza eskatzen dute, eta 12.853k erosteko etxebizitza. Kopuru handiena Bilbon dago, 32.097 eskatzailerekin, eta ondoren Barakaldon (9.322), Getxon (8.311), Basaurin (3.912), Portugaleten (3.665), Leioan (3.623) eta Santurtzin (3.459). Hala, Bizkaiko eskariaren zati handi bat metropolialdean biltzen da, batez ere Bilbon eta hurbilen duen hiri ingurunean.

Araban, 19.441 lagunek egin dute eskaera, 17.110k alokairuko etxebizitzak eskuratzeko eta 2.331k etxebizitza erosteko. Eskaeretatik ia guztiak Gasteizen biltzen dira, bertan 18.604 eskatzaile baitaude, hau da, lurralde osoan egiten diren eskaeren %95 baino gehiago. Gainera, Arabako hiriburuak du hiru hiriburuak alderatuz alokairu profil nabarmenena, izen-emateetatik 16.265 mota horri lotuta baitaude (%87,4).

Gipuzkoan, Etxebidek 32.211 eskatzaile ditu, 22.898 etxebizitza alokairuan eskuratzeko asmoz eta 9.313 erosteko asmoz. Azken erregimen horretan ikusi da gehikuntzarik handiena: aurreko hiruhilekoarekin alderatuta, erosketa eskaerak %24,4 handitu dira, alokairurakoak %8,6 handitu diren bitartean.

Donostia dago, 15.956 eskatzailerekin, zerrendaren buruan, ondoren Irun (3.622), Errenteria (3.373), Zarautz (2.883), Hernani (2.102) eta Lasarte-Oria (2.060) agertzen dira. Beraz, eskaera ez da hiriburuan soilik kontzentratzen, eta lurraldeko beste udalerri estrategiko batzuetan ere eskaera handia dago.