Larrialdia artatzearen garrantzia

Segurtasuneko sailburu Bingen Zupiriak eta Nafarroako Barne, Funtzio Publiko eta Justiziako sailburu Amparo Lópezek bilera bat egin dute berriki Nafarroako Jauregian, larrialdiei aurre egiteko mugaz gaindiko koordinazioa eta lankidetza aztertzeko eta indartzeko, bai eta segurtasun-politika publikoak eta polizia-kidegoen koordinazio-lana indartzeko ere.

Zehazki, larrialdia artatzeari eta baterako jardueretarako komunikazio-sistemak garatzeari buruz bi exekutiboek elkarrekin sinatutako planak jorratu dituzte bileran, hedatutako baliabideen koordinazioa eta eraginkortasuna hobetzeko eta herritarrei ematen zaien arreta hobetzeko.

Bi erakundeek adierazi dute garrantzitsua dela gizartearen autobabesaren kultura sustatzea larrialdiari dagokionez, hainbat arlotan prebentzioa sustatuz, eta bi administrazioek pertsonen babesaren alde lan egiteko duten konpromisoa ere azpimarratu dute, segurtasunaren eta larrialdien aldeko apustu irmoa baita.

Gainera, López kontseilariak eskerrak eman dizkio Euskadiri abuztuan Nafarroan izandako suteetan emandako laguntzagatik. Zehazki, Euskadik itzaltzeko helikoptero bat bidali zuen abuztuaren 8an hasitako Zarrakazteluko sutearen ingurura.

Bestalde, sail horren beste albiste batzuekin jarraituz, Euskadiko larrialdietako taldeek, SOS Deiak zerbitzuak koordinatuta, aireko istripu baten simulakroan parte hartu dute berriki Donostiako aireportuan. Aenak antolatu duen ariketak bi helburu izan ditu: erakundearen Larrialdietako Planean aurreikusitako jarduera- eta koordinazio-prozedurak ebaluatzea eta era horretako larrialdi bati erantzutean inplikatuta dauden kolektiboen integrazio- eta ezagutza-maila egiaztatzea.

Ariketaren garapena

Hegaldi komertzialean 23 bidaiari eta 4 tripulatzaile zeramatzan aireontzi batek izan duen istripuaren simulakroan, besteak beste, Eusko Jaurlaritzako Larrialdiei Aurre Egiteko teknikariek, Ertzaintzak, Osakidetza – Euskal Osasun Zerbitzuak eta suteak itzaltzeko Gipuzkoako Foru Aldundiko taldeek parte hartu dute. Hegazkinak, 22 pistan lurreratzeko maniobran, haizearen eraginez, pista jo du eskuineko hegalaren puntarekin, eta horrek bere ibilbidea desbideratu du eta pistatik irten da, San Rafaelgo aintziran pixka bat sartuz.