Aste Santuko irteera operazioan 532.000 mugimendu espero dira EAEn, eta beste horrenbeste itzulerakoan

Euskal Autonomia Erkidegoan (EAE) 532.000 lekualdaketa espero dira batez beste aurtengo Aste Santuko irteera operazioan, eta beste horrenbeste itzulerakoan, Eusko Jaurlaritzako arduradunek iragarri dutenez.

Joana Egiluz Babes Zibileko sailburuordeak eta Estibaliz Olabarri Trafikoko zuzendariak aurkeztu dute Aste Santuko Trafikoko Operazio Berezia, Euskadiko Trafikoa Kudeatzeko Zentrotik egindako agerraldian, Txurdinagan (Bilbo).

Bada, operazioa asteazkenean jarri da martxan, apirilaren 16an, 15:00etan, eta datorren astelehenean amaituko da, hilaren 21ean, 21:00etan.

Joan-etorriak iazkoak baino zertxobait handiagoak izatea aurreikusi da aurten Euskalmet euskal meteorologia agentziaren iragarpena ikusita, asteazkenera arte eguraldi desegonkorra izango baita, eta ostegunetik hobea izateko probabilitatea dagoelako.

Bada, ondorioz, EAEn 532.000 desplazamendu espero dira batez beste irteera operazioan, eta beste horrenbeste itzulerakoan. 2024an eguraldi ezegonkorra eta egun euritsuak izan ziren Aste Santuan eta 528.000 mugimendu erregistratu ziren irteeran eta beste horrenbeste itzuleran.

Ildo horretan, Egiluzek zuhurrak izateko eskatu du, eta nabarmendu du Eusko Jaurlaritza 'zero biktima' helburuarekin ari dela lanean Bide Segurtasunerako eta Mugikortasun Seguru eta Iraunkorrerako 2025eko Plan Estrategikoan hartutako konpromisoen esparruan.

"Inoiz ez dago soberan gogoratzea oporretan, garrantzitsuena, helmugara iristea eta etxera onik itzultzea dela. Atseden hartzeko eta gozatzeko egunak dira, eta, hori horrela izan dadin, ez gara nekatuko zuhurtzia, pazientzia, erantzukizuna eta errespetua eskatzen. Eta, gogoratu, arreta berezia eskaini behar zaiela kolektibo kalteberei, hala nola oinezkoei, motorzaleei edo txirrindulariei, besteak beste", esan du.

Babes Zibileko sailburuordeak asteazkenetik datorren astelehenera bitartean aurreikusitako joan-etorrien ondorioz trafikoari ahalik eta kalte gutxien eragiteko hartuko diren neurriak zehaztu ditu.

Horrela, Ertzaintzako 200 agente inguruk trafikoa zaintzeko eta kontrolatzeko lanak egingo dituzte, zirkulazioa ahalik eta arinena izan dadin. Joan-etorri handienak espero dira A-8an Kantabriako mugan eta Biriatuko ordainlekuan, eta Armiñonen AP-1 eta A-1 lotzen diren lekuan.