EAEk 15.700 landun irabazi ditu eta langabezia tasa %7,1era jaitsi da 2024an

Euskal Autonomia Erkidegoak (EAE) 15.700 landun gehiago zenbatetsi ditu eta langabezia tasa %7,2tik %7,1era jaitsi da 2024. urtean, Eustat euskal estatistika erakundeak astearte honetan argitaratutako datuen arabera.

EAEko lan merkatuari buruzko 2024ko laugarren hiruhilekoko datuek diote aurreko hiruhilekoan baino 2.000 landun gutxiago eta 1.100 langabe gutxiago daudela. Horrela, 75.600 langabe eta 995.100 landun zenbatetsi dira urteko azken hiruhilekoan.

Langabezia tasa %7,1 izan da, hau da, aurreko hiruhilekoko bera, eta landunen eta langabeen kopuruaren bilakaeraren ondorioz, 16 urte eta gehiagoko biztanleriaren gainean zenbatetsitako jarduera tasa %56,2ra iritsi da 2024ko laugarren hiruhilekoan, aurreko hiruhilekokoa baino hiru hamarren gutxiago.

Lurralde historikoei dagokienez, aurreko hiruhilekoarekin alderatuta, Gipuzkoan eta Bizkaian behera egin du okupazioak eta 2.500 eta 2.100 langile gutxiago daude, hurrenez hurren; Araban, berriz, okupazioak gora egin du eta 2.700 langile gehiago zenbatetsi dira. Hiriburuen kasuan, Bilbon 3.800 eta Donostian 1.200 landun gutxiago daude, eta Gasteizen 3.400 gehiago.

Okupazioaren jaitsierarik handiena gizonen kasuan gertatu da, 5.900 landun gutxiagorekin, eta emakumeen kasuan, berriz, 3.900 gehiago daude. Nazionalitatea kontuan hartuta, Espainiako nazionalitatea duten landunak 4.300 gutxiago dira (-%0,5), eta beste nazionalitateren bat dutenak 2.300 gehiago (+%2,4).

BESTE DATU BATZUK

Sektoreka, landunen kopuruak behera egin du industrian, 3.600 gutxiagorekin (-%1,8), mantendu egin da zerbitzuetan eta gora egin du eraikuntzan, 200 gehiagorekin (+%0,4), eta lehen sektorean, 1.400 gehiagorekin (+%15,9).

Okupazio tasa edo 16-64 urteko landunek adin horietako pertsonen guztizkoan duten proportzioa %0,1 puntu jaitsi da aurreko hiruhilekoarekin alderatuta eta %71koa da. Tasa hori %73,7ra jaitsi da gizonen kasuan, eta %68,2ra igo emakumeenean.