Bilboko Udalak sustatzen dituen adinekoentzako dantzaldiek hitzordu berriekin jarraituko dute ekainean Levante plazan eta Casillako kioskoan astebururo egingo diren saio bikoitzetan.
Bereziki adinekoentzat pentsatutako ekimena da, zuzeneko musikaren bidez bizitza aktiboa eta gozamen partekatua sustatzen dituena, Bilboko Udaletik jakinarazi dutenez.
Horrela, ekaineko asteburu guztietan dantzaldiak izango dira larunbatetan Levante plazan eta igandeetan Casillako kioskoan, 18:00etatik 21:00etara. Sarrera doakoa izango da, eta saio bakoitza orkestra desberdin batek girotuko du, parte hartzaileak dantzara animatzeko eta ondo pasatzeko.
Bilboko Udalaren zahartzaro aktiboaren aldeko konpromisoaren parte da dantzaldien ekimena, eta jarduera fisikoa, harreman sozialak eta ongizate emozionala sustatzeko antolatzen ditu.
Bestalde, beste gai batzuekin jarraituz, Bilboko Udalari udan terrazak jartzeko baimena eskatzeko epea ostiralean amaituko da, erkainaren 6an, eta, azken urteetan bezala, aurten ere bi baimen mota egongo dira, indarraldiaren arabera.
Horrela, Bilboko Udalak jakinarazi dutenez, terrazak abuztu osoan jartzea eskatu daiteke, hau da, hilaren 1etik 31ra (uztailaren 30eko 08:00etatik aurrera hasi ahal izango dira terrazak ipintzen eta irailaren 1eko gauerdirako kenduta egongo dira), edota Aste Nagusiko egunetan jartzea, hau da, abuztuaren 16tik 24era (abuztuaren 14ko 08:00etan hasiko dira jartzen eta 25eko gauerdirako kenduta egongo dira).
Epea igarota, ez da eskaera gehiagorik onartuko, eta ostalaritza establezimenduen titularrek eskabide orria bete beharko dute udal web orrian, 'Klik batera' atalean), modalitate bateko zein besteko terrazak jarri nahi badituzte.
Eskabide orriak aurrez aurre ere aurkez daitezke, San Agustin eraikinaren beheko solairuan, aldez aurretik hitzordua eskatuta 010 eta 944 010 010 telefonoetan edo udal web orrian.
