Jaurlaritzak 2026ko Bero Planaren aktibazioa aurreratu du tenperatura altuen aurreikuspena dela eta

Eusko Jaurlaritzako Osasun Sailak 2026ko Bero Planaren aktibazioa aurreratzea erabaki du, Segurtasun Sailarekin eta Euskalmet euskal meteorologia agentziarekin koordinatuta, egunotako tenperatura altuen aurreikuspena dela eta. Plana ekainaren 1ean hasi ohi da, baina aurten ostegun honetatik irailaren 30era arte egongo da indarrean, tenperatura altuek herritarren osasunean dituzten ondorioak prebenitzeko eta murrizteko asmoz, batez ere kolektibo zaurgarrienetan.

Jaurlaritzaren arabera, Bero Plana oinarrizko hiru ardatzetan egituratzen da: tenperaturak iragartzea eta ebaluatzea, beroak osasunean dituen ondorioen zaintza epidemiologikoa, eta abisuak eta prebentzio gomendioak jakinarazteko sistema bat aktibatzea. Gainera, arrisku egoerak hiru mailatan sailkatzen ditu: horia (abisua), laranja (alerta) eta gorria (alarma).

Planak Euskadiko Osasun Itunean jasotako jarraibideak jarraitzen ditu, 'One Health' ildo estrategikoan, hain zuzen, eta, prebentzio estrategia horri lotuta, Osasun Sailak Euskalmetekin koordinatzen du herritarrak muturreko tenperatura handietatik babesteko urteko Bero Plana.

Horrela, zaintza aktiboa egiten da, alerta goiztiarreko sistemak muturreko bero gertakariak detektatzeko eta osasun zentroetan prebentzio protokoloak aktibatzeko. Babes neurriei dagokienez, kolektibo kalteberentzako gomendio espezifikoak ematen dira (adinekoak, haurrak eta paziente kronikoak).

Ildo horretan, ostegun honetan eta datozen egunetan tenperatura altuak espero direnez, Osasun Sailak gogorarazi du garrantzitsua dela oinarrizko prebentzio neurriak hartzeabero kolpeak, deshidratazioa eta beroari lotutako beste arazo batzuk saihesteko.