Sprilur eraikin berria egiten ari da Ortuellako Ballonti industrialdean erabilgarri dagoen azken lursailean

Spri Taldean integratutako eta Jaurlaritzako Industria, Trantsizio Energetiko eta Jasangarritasun Sailari atxikitako Sprilur sozietatea 1.633 metro koadroko industria eraikin berria egiteko lanak hasi zituen urrian Ortuellako (Bizkaia) Ballonti industrialdean erabilgarri dagoen azken lursail industrialean.

Lurzoru industriala kudeatzeko Jaurlaritzaren sozietateak Ezkerraldeko udalerriko industrialdean duen 2.258 metro koadroko gehieneko eraikigarritasuneko azken lursailean egiten ari dira lanak, eta, amaitu ondoren, industrialdearen azalera eraikigarri osoa agortuta izango du Sprilurrek.

Sozietate publikoak jakinarazi duenez, industria eraikin berriak urbanizazio proiektuaren hasierako fasean egikaritutako hiri zerbitzu guztiak aprobetxatu ditu eta, beraz, ibilgailuentzako sarbidea, euri urak eta ur beltzak husteko sarea, eta ur, energia eta kable bidezko telekomunikazio hornidurak ditu.

Eraikuntza proiektuari dagokionez, Sprilurrek diseinatu du, hamar tonako garabi-zubi baten instalazioa txertatuz, bai eta zamalanetarako bi kai egokitu ere, pabiloiaren barruan kamioi artikulatuak hartzea eskatu dezakeen jardueraren bat jasotzeko.

Eraikuntza eredua soiltasunean eta kostuen optimizazioan oinarrituta planteatu da, eta 18,75x58 metroko eta 10 metroko altuera libreko pabiloi garbi gisa egituratu da, barne mugikortasunerako nahikoa leku behar duten jardueretarako. Eraikuntza aprobetxamenduak aukera ematen du pabiloia optimizatzeko, 49,45 metro koadroko solairuartea gehituz.

Halaber, eraikinak erraztu egingo du kamioi artikulatuek kaian deskargatzea, furgonetak bidaltzea eta prestatu litezkeen kudeaketa eta administrazioko beste gune batzuetara langileak eta pertsonak sartzea.

Fatxadetan, estalkian eta egituran erabiliko diren materialak bat datoz eraikin logistiko eta industrialetarako erabiltzen diren estandarrekin. Eraikuntzarako aukeratutako elementuak, nagusiki, pieza aurrefabrikatuak, jasangarriak eta birziklagarriak dira, ingurumeneko jardunbide egokiko protokoloa kontuan hartuz.

Eraikinak eguzki energia aprobetxatzen duten espazioak izango ditu fatxadaren gainean, argiztapen handiagoa behar duten eremuetarako. Estalkiak, bestalde, sabai-leihoak izango ditu goitikako argitasuna aprobetxatzeko eta, gainera, aukera emango du panel fotovoltaikoak instalatzeko.