UNAD Euskadi Hirugarren Sektore Sozialeko Sareen Sarean sartu da

Sareen Sarea Euskadiko Hirugarren Sektore Sozialeko Sareak azken ezohiko batzar nagusian onartu du UNAD Euskadi elkarteko kide berri izatea. Atxikipena aho batez onartu da, eta adikzioen arloan espezializatutako sare bat batzearen garrantzia nabarmendu du Sareen Sareak.

UNAD Euskadi Adikzioak Artatzeko Sarearen sarrerarekin, Sareen Sareak "gero eta anitzagoa eta espezializatuagoa den sektore baten erreferentziazko eragile gisa egiten duen lana sendotu du", guztira 18 sare bilduz.

Sareen Sareak "ilusio handiarekin" egin dio ongietorria kide berriari, eta UNAD Euskadiren sarrerak "hirugarren sektore sozialaren eraikuntza partekatua indartzerako duen potentziala" nabarmendu du.

UNAD Euskadik adikzioak dituzten pertsonen eta haien familien prebentzioan, arretan eta laguntzan lan egiten duten 15 erakunde biltzen ditu. Mendekotasun arazoak dituzten 4.000 pertsona baino gehiago eta 800 familia inguru artatzen ditu urtero, 500 profesional baino gehiagoren laguntzarekin eta gizarte eragileekin eta administrazio publikoekin lankidetzan. Gainera, 35.000 adingabe eta nerabe eta 34.000 familia baino gehiagori mesede egiten dieten prebentzio ekimenak garatzen ditu Euskadin.

Beste datu batzuk

Sareen Sarea 2014an sortu zen eta Euskadiko hirugarren sektore sozialeko 18 erakunde-sare biltzen ditu, hainbat esparru jorratzen dituztenak, hala nola desgaitasuna, gizarteratzea, familia, adinekoak, haurrak, etorkinak, enplegurako zentro bereziak, ekonomia soziala, laneratzeko enpresak edo garapenerako laguntza.