Gasteizek hiri mugikortasun jasangarriarekin duen konpromisoa berritu du Europako Civitas sarean

Gasteizko Udalak hiri mugikortasun jasangarriarekin duen konpromisoa berretsi du ostegun honetan, ofizialki berritu baitu Civitas sarearekiko atxikimendua. Europako Batzordearen ekimena da, eta europar hiriak biltzen ditu garraio garbi, eraginkor eta inklusiboko irtenbide berritzaileak bultzatzeko.

Civitas City Declaration adierazpena Beatriz Artolazabal Gasteizko alkateorde eta Espazio Publikoko zinegotziak sinatu du, hiriaren ordezkari gisa.

"Gasteizek hogei urte baino gehiago daramatza Civitasen parte aktibo izaten, ezagutzak partekatzen, berritzen eta mugikortasun iraunkorra hiri osasungarriagoak eta bizigarriagoak eraikitzeko giltzarria dela frogatzen. Sare horretako kide izateak esan nahi du hiri berdearen, klimaren aldetik neutroa den eta Europarekin konprometitua dagoen eredu baten aldeko apustua egiten jarraitzea", azpimarratu du Artolazabalek izenpetzearen ondoren.

Arabako hiriburuak "oso rol aktiboa izan du historikoki" Civitas sarean. 2012an, Civitas Nazioarteko Konferentziaren egoitza izan zen; Europako ehunka aditu eta arduradun bildu ziren eta arrakasta izan zuen antolaketan zein parte hartzean.

Gainera, aurreko legealdian, orduko alkatorde eta Hirigintzako zinegotzi Ana Oregi Citivaseko Batzorde Politikoko kide izan zen, eta, horri esker, hiriak presentzia izan zuen sarearen erabaki estrategikoak hartzerakoan.

Era berean, Gasteizek mugikortasunaren arloan Civitasek finantzatutako Europako hainbat proiektutan parte hartu du urteotan zehar. "Gure hiria mugikortasunaren arloko eredutzat hartzen da Europan. Urrats honekin, beste hiri batzuetatik ikasten jarraituko dugula ziurtatzen dugu, gure esperientziak partekatuz eta klimaren aldetik neutroa eta erresilientea den Europa eraikitzeko erronka handiari lagunduz", gaineratu du Artolazabalek.

Europako Batzordeak 2002an abian jarritako Civitas ekimenak hirien arteko lankidetza sustatzen du, hiri garraioko sistema iraunkorragoetarako trantsizioa bizkortzeko. Gaur egun, 300dik gora hirik osatzen dute sarea, esperientziak trukatzea eta mugikortasunean berrikuntza sustatzea helburu.