Industriaren urtarrileko prezioak %0,5 gehitu dira EAEn hil artean eta %2,4 jaitsi urte artean

Euskal Autonomia Erkidegoko (EAE) industriaren prezioek %0,5 egin dute gora urtarrilean aurreko hilaren aldean, eta horrela, urtarrileko urte arteko tasa %2,4 jaitsi da, Eustat euskal estatistika erakundeak landutako datuen arabera.

Azterketa zehatzagoa eginda, energia elektrikoa, gasa eta lurruna (%8,6), erauzketa industriak (%6,9) eta produktu informatiko, elektroniko eta optikoen fabrikazioa (%2,8) sektoreek izan dituzte prezio hazkunderik nabarmenenak urtarrilean aurreko hilaren aldean. Aitzitik, prezioetan hil batetik bestera jaitsierarik handiena izan duen sektorea zuraren, paperaren eta arte grafikoen industria izan da (-%1,8).

HELBURUA

Ildo horretatik, helburu ekonomikoaren araberako ondasunen sailkapenari jarraituz, abenduaren aldean, energiaren prezioak %3,6 eta kontsumo ondasunenak %1,1 igo dira. Ekipamenduko ondasunei dagokienez, prezioak %0,5 jaitsi dira aurreko hilaren aldean, eta bitarteko ondasunetan %0,1.

Urte arteko aldian, prezioen igoerarik handienak produktu informatiko, elektroniko eta optikoen fabrikazioa (%12,6) eta farmazia produktuen fabrikazioa (%8,6) adarretan izan dira, eta jaitsierarik handienak koke lantegiak eta petrolio fintzea (-%12,5) eta energia elektrikoa, gasa eta lurruna (-%10,3) adarretan.

Helburu ekonomikoaren araberako ondasun talde handien prezioen urte arteko aldakuntza negatiboa izan da energian (-%11,3), bitarteko ondasunetan (-%0,5) eta ekipamenduko ondasunetan (-%0,3), kontsumo ondasunetan %0,1 igo diren bitartean, ondorioztatu dutenez.