Arabako Foru Aldundiko gobernu kontseiluak lurralde historikoko toki entitateei zuzendutako 2026-2027 aldirako Obra eta Zerbitzuen Foru Planaren oinarri orokorrak eta laguntzen deialdia arautzen dituen foru dekretua onartu du astearte honetan. Programak 39.975.610 euroko aurrekontua du, tokiko azpiegiturak eta ekipamenduak hobetzeko udal jarduerak finantzatzeko.
Ramiro Gonzalez ahaldun nagusiak azaldu duenez, laguntzak norgehiagoka erregimenean emango dira, eta oinarrizko azpiegitura obrak nahiz ekipamendu eta zerbitzu publikoetako jarduketak estaliko dituzte. Gainera, 300.000 euroko zuzkidura espezifikoa aurreikusi da diruz lagundutako proiektuekin lotutako ordainsari teknikoak finantzatzeko.
Planaren helburua da Arabako udalerriei eta kontzejuei bizi kalitatea hobetzen laguntzea, lurralde oreka, irisgarritasun unibertsala, jasangarritasuna eta berdintasuna sustatuz.
Eskaerak uztailaren 31ra arte aurkeztu ahal izango dira, foru egoitza elektronikoaren bidez. Erakunde bakoitzak eskabide kopuru jakin bat aurkeztu ahal izango du, biztanleriaren eta lurralde ezaugarrien arabera, eta dagokion dokumentazio teknikoa jaso beharko du. Jarduketak 2027ko abenduaren 31 baino lehen burutu beharko dira.
Horrela, Gonzalezek nabarmendu duenez, Arabako Foru Aldundiak lurralde osoan kalitatezko azpiegiturak eta zerbitzu publikoak sustatzeko konpromiso instituzionala indartzen du, ekitate eta arrazionaltasun ekonomikoko irizpideekin, eta udalerriekin eta toki erakundeekin lankidetza estuan.
