Adimen artifizialarekin sortutako irudien lehiaketa abiatu dute Guggenheim museoak eta Euskaltel Fundazioak

Guggenheim Bilbao Museoak eta Euskaltel Fundazioak 'AA lehiaketa: Imajinatu etorkizuna' adimen artifizialaren bidez sortutako irudien lehiaketa antolatu dute Google Cloud-en laguntzarekin.

'Inspirazioz betetako konexioak: artea eta teknologia etorkizun gizatiarragoa lortzeko' gaiarekin, lehiaketaren helburua da berrikuntzak telekomunikazioetan eta artean hurbiltasuna, tokiko identitatea eta iraunkortasuna moduko balioak nola adieraz ditzakeen hausnartzera gonbidatzea, antolatzaileek azaldu dutenez.

Horretarako, parte hartzaileek irudiak sortu beharko dituzte adimen artifiziala erabiliz, lehiaketarako berariaz egindako plataforman. Proposamenak aurkezteko epea irailaren 30ean amaituko da (gehienez 1.000 parte hartzaile).

Irabazleen izenak urriaren 8an jakinaraziko dira, adimen artifizialari buruzko gogoeta eta eztabaida foro bat barne hartuko duen ekitaldi batean, non arlo artistiko zein teknologikoko askotariko kolektiboetako profesionalek parte hartuko duten.

Guggenheim Bilbao Museoak eta Euskaltel Fundazioak berrikuntza eta sormena sustatzeko duten helburuaren baitan antolatu dute lehiaketa, eta parte hartzaileei aukera eman nahi diete tresna berriek hizkuntza bisuala nola zabaldu dezaketen aztertzeko eta galdera berriak sortzeko, kasu honetan museoei eta teknologiari buruzkoak.

Lehiaketan nahi duen guztiak parte har dezake, profesionalek zein publiko orokorrak (baldintza bakarra da adinez nagusia izatea eta Museoaren Jarraitzaile gisa doan erregistratzea, plataformatik bertatik). Erabiltzaileek beren sormena erakutsiko dute 'prompt' edukien bidez (adimen artifiziala irudi iradokitzaileak eta bisionarioak sortzera eramaten duten jarraibideak dira).