CAFek mantentze lanetarako 400 milioi euro inguruko kontratuak lortu ditu Erresuma Batuan eta Kolonbian

CAF konpainiak mantentze lanetarako kontratu berri bana eskuratu ditu Erresuma Batuan eta Kolonbian, eta bien baterako bolumena 400 milioi euro ingurukoa da. Kontatu berriei esker, tren zerbitzuen negozioa haztearen alde egin duen apustua baieztatu du euskal enpresak.

Hain zuzen ere, CAFek jakinarazi duenez, gaur egun, zerbitzuetako 150 kontratu baino gehiago kudeatzen ditu 20 herrialde baino gehiagotan, eta, hori guztia ahalbidetzeko, 4.000 langile inguru ditu.

Bada, alde batetik, Northern Trains Limited-ek, Eversholt Rail Limited-ek eta CAFek Britainia Handiko operadorearen tren flotaren mantentze lanak egiteko lankidetza hitzarmena berritu dute, eta horrela, euskal konpainiak mantentze lanetako zerbitzuak emango ditu beste hamar urtez.

Akordioaren arabera, CAFek euskarri tekniko integrala eskainiko du, hasierako zuzenketako mantentzea, ordezko piezen hornikuntza eta ekipo nagusien berrikusketa handiak barne.

Kontratuaren xede den trenak 2018 eta 2020 artean hornitu zizkion CAFek Eversholt Rail-i, eta 101 trenek osatzen dute: lau kotxeko 12 unitate elektriko, hiru kotxeko 31 unitate, bi kotxeko 25 diesel-unitate eta hiru kotxeko 33 diesel-unitate.

Bestalde, CAFek zerbitzuetarako kontratua adostu du Kolonbiako Medellin hiriko metroarekin 38 unitateren ziklo luzeko mantentzea egiteko. 2009tik aurrera CAFek ondoz ondoko hainbat kontratutan hornitutako unitateak dira.

Akordioak 25 trenen berrikuspen orokorra eta 13 trenen tarteko berrikusketa jasotzen ditu. 38 unitate horietako bakoitza hiru kotxek osatzen dute eta, gaur egun, Medellingo metropoli eremuko metro sarean zirkulatzen dute.