Hezkuntza Sailak eta Haurreskolak Partzuergoak eskolatze goiztiarrarekiko konpromisoa berretsi dute

Haurreskolak Partzuergoak zabalik du izena emateko epea, irailetik aurrera seme-alabak eskolatu nahi dituzten familientzat. 2024-2025 ikasturtean jaiotako haurren gurasoek edo legezko tutoreek maiatzaren 10era arte egin ahal izango dute eskaera, aurrez aurre edozein haurreskolatan, edo online, www.haurreskolak.eus helbidean.

Eskaera bakoitzean gehienez bost eskola ezberdin markatu daitezke, lehentasun-ordenaren arabera. Izapidea aurrez aurre egiten bada, lehen postuan aukeratutako haurreskolan bakarrik aurkeztu behar da eskaera.

Haurrek, gutxienez, 16 aste izan beharko dituzte haurreskolan hasteko eta gutxienez hamar eskola-eguneko egokitze-aldia egingo dute.

Maiatzaren 7tik 15era bitartean jaiotzen direnentzat, izena emateko epea maiatzaren 24ra arte luzatuko da. Horrez gain, Partzuergoak izena emateko epe berriak irekiko ditu irailetik apirilera bitarte, hilaren 1etik 10era, haurrak hurrengo hileko lehen lanegunean eskolatzeko.

Aukera-berdintasunaren eta hezkuntza-arrakastaren aldeko apustua

Eskolatze goiztiarra funtsezko faktorea da haurren garapen integralerako, nabarmen laguntzen baitu ongizate emozionala, oinarrizko gaitasunak eskuratzen eta ondorengo hezkuntza-arrakasta ziurtatzen.

Doako hezkuntza goiztiarrak, gainera, jatorrizko desberdintasunak konpentsatzen eta gizarte bidezkoagoa eraikitzen laguntzen du, haur guztiek beren ahalmena baldintza berdinetan garatu ahal dezaten.

Haurreskolak Partzuergoan zerbitzua doakoa izateak —2025-2026 ikasturtean ere hala izango da— indartu egiten du Eusko Jaurlaritzak hezkuntza-ekitatearekin, justizia sozialarekin eta familia guztiek kalitateko eskolatze goiztiarra izateko duten eskubidearekin duen konpromisoa.

Kalitatezko zerbitzua, familiei laguntzeko

Balio hezitzaileaz gain, haurreskolen sareak familia eta lana uztartzen laguntzen du, familiei laguntzen baitie haien seme-alaben hazkuntzaren une erabakigarri horretan. Ingurune segurua, afektiboa eta hezitzailea eskaintzen ditu, ikaskuntza eta zainketak uztartuta.

Gaur egun, Haurreskolak Partzuergoaren sareak 238 haurreskola ditu Euskadiko 180 udalerritan, eta guztira 8.844 plaza eskaintzen ditu 0 eta 2 urte bitarteko hezkuntza-aldirako. Datorren ikasturtean haurreskola berriak irekitzea aurreikusi da, gaur egun bederatzi udalerritan garatzen ari diren proiektuei esker. Hala, 377 plaza gehiago egongo dira eskuragarri datozen hilabeteetan.

Haurreskolak Partzuergoak eta Eusko Jaurlaritzako Hezkuntza Sailak duela gutxi publizitate-kanpaina berri bat bultzatu dute Haurreskolen kalitate-zerbitzua ezagutzera emateko. Haurreskoletan hasten da eskolatzea eta ongizatea bermatzeko ikaskuntza-prozesua. «Dinosauro-oinatzak, eskalada zirraragarriak eta siesta mitikoak. Hemen jolastuz ikasten dute eta behar duten arreta nahiz maitasun guztiarekin hazten dira» dio publizitate-kanpainak.