Herritarren abesbatza bat Euskadiko Orkestrarekin ariko da Donostian eta Bilbon

Euskadiko Orkestrak kontzertu denboraldiko zortzigarren programa hasi du ostegun honetan, martxoaren 13an, Glanert / Brahms izenburupean. Berritasun nagusia da Abestu Euskadiko Orkestrarekin proiektuaren lehen edizioaren emaitza aurkeztuko dela, hau da, abeslari ez-profesionalen abesbatza batek oholtza partekatuko duela orkestrarekin Donostian eta Bilbon.

Hain zuzen, Euskadiko Orkestrako iturriek jakinarazi dutenez, herritarren abesbatza datorren astelehenean ariko da Donostiako Kursaal auditoriumean (19:30), eta larunbatean Euskalduna Bilbao jauregian (19:30).

Euskadiko Orkestrak 120 ahots hautatu zituen zozketa bidez joan den urteko abenduan. Parte hartzeko baldintzak izan dira gutxieneko musika prestakuntza izatea, partiturak irakurtzen jakitea eta aurreikusitako hamar entseguetara ahalik eta gehien joatea.

HAUTATUAK

Hautatuak urtarrilaren 15ean hasi ziren elkartzen Euskadiko Orkestraren Miramongo egoitzan, eta entseguak asteazkenero egin dira bi hilabetez, Gorka Mirandaren zuzendaritza musikalarekin.

Entseguen azken fasean, Easo Abesbatzako 40 kidek egin dute bat herritarren abesbatzarekin laguntza emateko, eta lan hori ere egingo dute eszenatoki gainean kontzertuetan.

500dik gora pertsonak eman zuten izena ekimenean, eta hautaketarako ahots soprano, mezzosoprano, kontralto, tenor eta baxuen nahasketa orekatua eta askotarikoa bilatu da. Parte hartzaileen %51 emakumeak dira, eta %49 gizonak. Ahotsen aukeraketan ere belaunaldi ugariren parte hartzea lortu da: gazteenak 21 urte ditu, eta zaharrenak 82.

Kontzertu bakoitzean gutxienez ehun ahotseko abesbatza bat igoko da oholtzara, herritarren eta Easo Abesbatzaren ahotsak nahastuz. Herritar bakoitzak gutxienez kontzertu batean parte hartuko du, eta kasu batzuetan errepikatu egingo du.

Guztira, 15 minutu inguru egongo da korua eszenatoki gainean kontzertu bakoitzean, eta Guiseppe Verdiren 'Nabucco'-ren 'Va, pensiero' eta 'Il trovatore'-ren 'Ijitoen korua', eta Pablo Sorozabalen 'Maite' interpretatuko ditu.

Ekimena ARTIS+ artea gizarteratzeko europar proiektuaren baitan dago. Euskadiko Orkestrak 2027ra arte parte hartuko du mugaz gaindiko lankidetza sustatzen duen egitasmoan, beste hainbat bazkiderekin batera, hala nola Orchestre National du Capitole de Toulouse, L'Auditori eta Bartzelonako OBC Orkestra, eta Pauko Orkestra.