Eusko Jaurlaritzak Joxe Mari Korta sariak ematen dizkie urtero beren bizitza eta enpresa ibilbideagatik nabarmendu diren euskal enpresariei, Industria, Trantsizio Energetiko eta Jasangarritasunaren Sailaren bitartez, eta aurtengo edizioko sarituak Pepe Barreira Lorenzo (SEA Arabako Enpresak elkarteak proposatua), Begoña Castro Feo (Cebek Bizkaiko Enpresarien Konfederazioak aurkeztua) eta Jose Angel Muro Zabaleta (Adegi Gipuzkoako Enpresen Elkarteak aurkeztua) dira.
Industria, Trantsizio Energetiko eta Jasangarritasuneko sailburu Mikel Jauregi buru duen epaimahaiak saritutako pertsonek beren jarduera profesionala garatu duten enpresa sektoreetan izan duten inplikazioa nabarmendu du, baita "enpresa balioen garapenean, enpresen sorkuntzan, eta jarduera eta lanpostu berrien sorreran duten garrantzia ere".
Joxe Mari Korta sariak ETAk 2000. urteko abuztuan erail zuen enpresari eta Adegi presidente izandako Joxe Mari Kortaren izena daramate. Euskal ekosistema ekonomikoaren buru diren eta beren inbertsioen eta lanaren bidez enplegua eta aberastasuna sortzen duten pertsonen dohainak eta ahalegina publikoki aitortzeko ezarri ziren. Enpresen errotzea eta industria sarearen hobetzea sustatzen duten pertsonak ere aintzatesten dituzte.
Aurten 24. edizioa da, eta dagoeneko Eusko Jaurlaritzak enpresa arloan ematen duen sari nagusiak dira. Azaroaren 26an Donostian egingo den ekitaldi batean banatuko dira, Imanol Pradales Eusko Jaurlaritzako lehendakaria buru dela.
Hautagaiak Araba, Bizkai eta Gipuzkoako enpresa elkarteek, merkataritza erakundeek edo profesionalen elkargoek proposa ditzakete, bai eta Joxe Mari Kortaren Bidetik fundazioak eta Euskadin egoitza duten enpresek ere.
