Ikasle bakoitzeko batez besteko gastua handitu da irakaskuntzan

Zenbat da ikasle bakoitzeko batez besteko irakaskuntza-gastua hezkuntza-zentro publikoetan? Eustat Euskal Estatistika Erakundeak egindako txosten baten arabera, ikasle bakoitzak 6.795 euro gastatzen ditu hezkuntzako ikastetxe publikoetan. 2020-2021 ikasturteko datuak dira, eta datu horiek 2017-2018 ikasturtekoak baino % 13,6 gehiago dira.

Hala, eta ildo horretatik jarraituz, irakaskuntzako gastuaren zenbateko osoa 2.038 milioi eurokoa da, eta % 11,5eko hazkuntza izan da. "Gastu horrez gainera, jarduera eta zerbitzu osagarriena eta kapitalena ere kontuan hartzen baditugu, gastu osoa 2.222 milioi eurokoa da", azpimarratu dute txostenean.

Bestalde, ikastetxe publikoetako gastuaren zati handiena, % 96,5, jarduera arruntak ordaintzera bideratzen da, eta gainerakoa, % 3,5a, inbertsioetara. Bestalde, gastu arrunta, 2.145 milioi euro honela banatzen da: % 95, irakaskuntzara bideratzen da zuzenean, eta kapitulu esanguratsuena pertsonalaren gastuena da, % 91,5 baitagokio epigrafe horri; % 4,2 jantokiko eta eskola-garraioko zerbitzu osagarrietara bideratzen da, nagusiki.

Emandako irakaskuntza-motaren arabera, "unibertsitatearen aurreko erregimen orokorreko irakaskuntza-mailak ematen dituzten ikastetxeei gastu osoaren % 75,3 dagokie, eta unibertsitateari % 19,6, eta erregimen bereziko irakaskuntza-zentroei (artistikoak) gainerako % 5,1a", azpimarratu dute eta erantsi dute: "Ez da desberdintasun esanguratsurik antzematen 2020/21 ikasturte honen eta aurrekoen artean".

Azkenik, 2020-2021 ikasturtean, ikastetxe publikoen sarrera osoa 2.252 milioi eurokoa izan da; % 96,3 sarrera arruntari dagokio eta % 3,7, kapital-sarrerari. Sarrera arruntaren osagai nagusiak dirulaguntza publikoak dira, guztizkoaren % 94,1. Iturri pribatuei % 5,7 dagokie, nagusiki irakaskuntza-kuoten (% 2,4) eta jarduera eta zerbitzu osagarrien (% 2,6) bidez.