Leon Benavente eta Angel Stanich ere Bilboko BBK Salako Sirimiri zikloan izango dira

Sirimiri zikloak Leon Benavente eta Angel Stanich sartu ditu 2026ko programazioan Bilboko BBK Salan, eta sarrerak salgai daude jada salabbk.bbk.eus eta lasttour.org webguneetan. Aurretik iragarrita zegoen Ladilla Rusa taldeari gehitu zaizkio bi izen berriak, Last Tour konpainiak jakinarazi duenez.

Horrela, Sirimiri zikloaren Lehen hitzordua ekainaren 19an izango da, Ladilla Rusa taldearekin. Tania Lozanok eta Victor F. Claresek osatzen dute bikotea, eta 2017tik estatuko elektropoparen proiektu berezi eta ezagunenetako bat eraiki du.

Bizitza osoko bi lagunen arteko txantxa gisa hasi zena nortasun propioa zuen proposamen bihurtu zen, umorea, ironia eta jai energia nagusi zituela, eta abesti enblematikoak sortuz, hala nola 'Bebo (de bar en peor)', 'Criando Malvas' edo 'Macaulay Culkin'. Orain, abesti eta ikuskizun berriak prestatu dituzte.

Bigarren kontzertua Leon Benaventek eskainiko du irailaren 26an. Abraham Boba, Eduardo Baos, Luis Rodriguez eta Cesar Verdu musikariek osatu zuten proiektua 2012an, Espainiako eszenan ibilbide luzea duten lau musikari ospetsuk. Izen bereko debuta egin zuenetik (2013), taldea berehala sendotu zen herrialde osoko jaialdi eta aretoetan, "soinu identitate nahastezina eta presentzia eszeniko bizia uztartzen dituen ibilibide iraunkorra eraikiz".

'Nueva Sinfonía Sobre el Caos' (2024) da taldearen azken lana, "disko labur baina zorrotza, kantu egitura klasikoak eta forma arriskutsuko ehundura elektroniko indartsu eta dantzagarriak, hedonistak eta, aldi berean, gogoetatsuak uztartzen dituena".

Sirimiri zikloaren 2026ko azken kontzertua urriaren 30ean izango da eta Angel Stanichek eskainiko du. 'Por La Hierba' aurkeztuko du musikari kantabriarrak.