Adikzioen prebentzioari buruzko herritarrentzako informazio eta sentsibilizazio jardunaldia egin du Bilboko Udalak

Bilboko Udaleko Osasun eta Kontsumo Sailak adikzioei buruzko informazio eta sentsibilizazio ekimen bat egin du astelehen honetan, Adikzioen VI. Planaren baitan, herritarrei fenomeno horri buruzko informazioa, orientazioa eta aholkularitza emateko eta hirian dauden laguntza eta akonpainamendu baliabideak ezagutzera emateko.

Ekimena bat dator uda garaiaren hasierarekin, eta helburu du, batetik, adikzioen prebentzioa indartzea eta, bestetik, adikzioak dituzten pertsonei eta haien senideei laguntzen dieten hiriko baliabide asistentzialak eta laguntza taldeak ikusgai egitea, Bilboko Udalak jakinarazi duenez.

Alvaro Perez Osasun eta Kontsumoko zinegotzia Emakumeen Azaroaren 25eko plazan jarritako informazio gunean izan da goizean, eta adikzioen arloan lan egiten duten profesionalek eta erakundeek informazioa eta aholkularitza eman dizkiete bertaratu direnei.

Perezek nabarmendu duenez, "prebentzioa adikzioei aurre egiteko tresna eraginkorrenetako bat da oraindik ere. Funtsezkoa da herritarrek eskura dituzten laguntza baliabideak ezagutzea eta behar dutenean laguntza aurki dezaketela jakitea".

Ekimenean, adikzioen arloko elkarri laguntzeko taldeen Bilboko sareko kideek eta Hiesaren aurkako Herri Batzordeko eta T4 elkarteko profesionalek hartu dute parte. Horrez gain, Alubiz Bilbao elkarteak ere parte hartu du Federación Española de Jugadores de Azar Rehabilitados (FEJAR) federazioak emandako azpiegitura lagatuta.

"Erakundeen, profesionalen, elkarteen eta osatze prozesuak bizi izan dituzten pertsonen arteko baterako lana ezinbestekoa da herritar guztien ongizatearekin konprometituago dagoen hiri osasungarri eta inklusiboago bat eraikitzeko", azaldu du zinegotziak.

LIBURUXKA

'Adikzioek kezkatzen zaituzte? Zurekin goaz bizimodu osasungarriago baterantz' informazio liburuxka zabaltzeko ere balio izan du ekimenak. Eskuorria Osasun eta Kontsumo Saileko Adikzioen Prebentzioko Negoziatuak prestatu du Bilbon dauden baliabide asistentzialak eta elkarri laguntzeko taldeak ezagutzera emateko, eta farmazietan, udaltegietan, liburutegietan, gizarte zerbitzuetan eta osasun mentaleko zentroetan egongo dira eskuragarri.

Eguneko programak 18:00etan izango du azken ekitaldia, BBK Sasoiko Zentroan, Irantzu Gonzalez Llona psikiatrak emango duen 'Adikzioa beste arazo batzuei erantzuteko' hitzaldiarekin. Adikzio jokabideen jatorrian egon daitezkeen egoerak identifikatzearen eta horiei aurre egitearen garrantzia jorratuko du.

"Pertsonen osasunarekin eta ongizatearekin konprometituta dagoen hiri gisa aurrera egiten jarraitu nahi dugu, eta, horretarako, informazio erabilgarria zabaldu nahi dugu eta ikusgai jarri nahi dugu adikzio prozesuak bizi dituztenei eta haien familiei laguntzen dieten baliabide espezializatuek eta erakundeek egiten duten lana", esan du Alvaro Perezek.