Eusko Jaurlaritzako Justizia eta Giza Eskubideen Sailak Giza Eskubideen Defendatzaileak Babesteko Euskal Programarako hautagaitzak aurkezteko epea ireki du astelehen honetan, irailaren 16an, Giza Eskubideen eta Biktimen Zuzendaritzaren bitartez. Epea urriaren 16ra arte egongo da zabalik, eta euskal erakunde, elkarte eta GKEek aurkez ditzakete hautagaitzak.
Zehar-Errefuxiatuekin erakundearekin lankidetzan kudeatzen da programa, eta eLankidetza Lankidetzaren eta Elkartasunaren Euskal Agentziaren laguntza du. Bere helburua da Euskadin hiru pertsona hartzea sei hilabetez, hain zuzen ere, giza eskubideen defentsan egiten duten lanagatik mehatxuak eta jazarpena edo beren bizitza, osotasun fisikoa eta psikologikoa, baita haien familiena ere, arriskuan jartzen duten egoerak bizi dituztenak.
Jagoba Alvarez Eusko Jaurlaritzako Giza Eskubideen eta Biktimen zuzendariak programaren balioa nabarmendu du. 13 urteko jardunaren ondoren, "erreferente" gisa finkatu dela esan du, eta bere "berezitasunagatik" nabarmentzen dela, eragile politiko eta sozialen gehiengoak babesten duelako, babes ekonomiko handia izateaz gain. Ezaugarri horiek direla eta, bere iritziz, "Giza Eskubideen Defendatzaileak Babesteko Euskal Programa erreferentea da Espainian, aldearekin".
"Programa honekin dugun konpromisoaren beste berezitasunetako bat da egonaldia amaitu ondoren harrerako pertsonaren jatorrizko lekura egiten dugun bisita. Ekintza honek babes aterki bat zabaldu nahi du, beren lan ausartarekin edozein herrialdetan demokrazia indartzeko funtsezko zutabe bihurtzen direnen inguruan", azaldu du.
Era berean, Alvarezek ziurtatu du giza eskubideen defendatzaileen lana "ezinbestekoa" dela oinarrizko eskubideak sustatzean, aurrera eramatean eta babestean, batez ere desberdintasunaren, diskriminazioaren, bazterkeriaren edo pobreziaren ondorioz kalteberatasun egoeran dauden pertsonen alde egiten dutenean. "Haien lana ezinbestekoa da, eta Eusko Jaurlaritzak tinko babestuko ditu giza eskubideen defentsaren alde bizia arriskatzen dutenak", gaineratu du.
