Bilboko Udalak sustatutako Bilbo Balioen Hiria proiektu estrategikoak aipamen berezia eskuratu du CGLU-Mexiko Hiria-Kultura 21 sarien laugarren edizioa. Hiriek balio eta eskubide kulturalak sustatzeko duten lidergoa nabarmentzen da sariotan, tokiko garapen jasangarriaren zeharkako motor diren neurrian.
Bada, Bilboko Udaletik jakinarazi dutenez, munduko eskualde guztietako hirien eta tokiko gobernuen 89 hautagaitzen artean, Bizkaiko hiriburua nabarmendu dute udal programa horrengatik. Proiektu "berritzaile eta anbizio handikoa" da, eta hiriko sektore esanguratsu guztien, elkarteen eta herritarren artean, parte-hartzearen bidez, balio esparru partekatua eraikitzen ari da, hiriaren etorkizuneko garapenean aurrera egiteko.
Ekimenaren azken helburua "komunitate indartsuagoa eta kohesionatuagoa" eraikitzea da, "Bilbon ongizatea eta bizikidetza sustatzen dituzten balio partekatuetan oinarrituta".
Sariak banatzeko ekitaldia Mexikon egingo da ostegunean, uztailaren 25ean, eta 'Berrikuntza eta prospektiba: hiri eta lurraldeetarako kultura-transferentziako ereduak' nazioarteko mintegiarekin lotuta egongo da. Eider Inunciaga Euskarako, Herritarren Arreta eta Partaidetzako, 2030 Agendako eta Nazioarteko Gaietako zinegotziak jasoko du saria.
Inunciagaren esanetan, "gaur egun arlo digitala lehenesten dugu arlo pertsonalaren aurretik, berehalakotasuna hausnartutako prozesuen aurretik, eta emaitza normalean prozesuaren gainetik dago. CGLU Kultura bezalako sari batek 'Bilbo Balioen Hiria' proiektua aintzat hartu izanak indarra ematen digu balioetan eta kulturan oinarrituta lan egiten jarraitzeko, Bilboko Udalak presente izan ditzan eguneroko bizimoduan, ekintza guztietan eduki behar diren balioak".
