Gasteizko Udalak 200.000 euro inbertituko ditu segurtasuna hobetzeko Lasarteko Atean eta Salvatierrabiden

Gasteizko Udalak oinezkoen eta txirrindularien bide segurtasuna hobetzeko jarduketari ekingo dio Lasarteko Ateko eta Salvatierrabide kaleko hainbat gunetan, zirkulazio handia eta oinezkoen, bizikleten eta garraio publikoaren joan-etorri handia dituen ingurunean, hain zuzen ere. Lanek 200.000 euroko aurrekontua eta hiru hilabeteko gauzatze epea dute.

Gasteizko Udaletik jakinarazi dutenez, batez ere, Lasarteko Atearen elkargunean, Fernandez de Viana Eskultorea eta Joaquin Lucarini Eskultorea kaleen sarbideetan eta BEIren ardatzeko hainbat lekutan egingo da esku hartzea. Gainera, Nieves Cano eta Iruñea kaleen arteko bidegurutzea hobetzeko jarduketa txikiak ere egingo dira.

Proiektuaren helburu nagusietako bat da Lasarteko Atearekiko elkargunean dagoen oinezkoen eta bizikleten pasabidearen segurtasuna indartzea. Horretarako, erdiko babeslekua handitu eta parterre berrien eta elementu fisiko altuen bidez babestuko da, oinezkoen, bizikleten eta ibilgailuen arteko bizikidetza hobetzeko eta ustekabeko trafiko inbasioak saihesteko.

Gainera, egungo pasabidea espaloiko kota altuko pasabide bihurtuko da, ibilgailuak abiadura murriztera behartzeko eta oinezkoen eta bizikleten ibilbideei lehentasuna emateko. Bidegorriaren argiztapenean, drainatzean eta geometrian ere hobekuntzak egingo dira, bidegurutzeak seguruagoak eta erosoagoak izan daitezen.

Erreformari esker, gainera, irisgarritasuna hobetuko da, eta egun hondakinen edukiontziek okupatzen dituzten hainbat gune berrantolatu ahal izango dira Salbatierrabiden. Horretarako, espaloiak zabaldu, oinezkoentzako plataforma zabalagoak sortu eta hiriko elementuak berrantolatuko dira, hala nola semaforoak, argiak edo txorkoak.

Proiektuak azpiegitura berdearekin lotutako jarduketa berriak ere barne hartzen ditu, BEIren ardatzeko hainbat puntutan txorkoak eta zuhaitzak instalatuz, trafiko fluxuen arteko bereizketa indartzeko eta bide segurtasuna hobetzeko.

Esku hartzea inguruko bizilagunekin landu da, eremuko segurtasunaren eta irisgarritasunaren arloan hobekuntzak eskatzen ari baitziren. Horrela, Gasteizko Udalak hainbat topaketa izan ditu Gure Batan auzo elkartearekin, proposamena partekatzeko eta haien ekarpenak jasotzeko.