Karga-bizikletak doan probatzeko aukera izango dute VGBiziz Sarearen erabiltzaileek

Berrikuntza gisa, horrelako bi ibilgailu erabilgarri egongo dira, sei hilabetez

12.10.2021 | 00:31
Lerro hauekin batera agertzen den irudian, karga-bizikletaren argazkia. Argazkia: Utzita (Gasteizko Udala)

GASTEIZ – Bi kanpaina berri sei hilabetez. Gasteizko Udalak, Ingurumen Gaietarako Ikastegiaren bidez, bi kanpaina berri sortu zituen atzo hirian karga- bizikletak probatzeko. Gainera, berrikuntza gisa, mota horretako bi bizikleta jarriko dira. Sei hilabetez egongo dira erabilgarri, VGBiziz sareko edozein erabiltzailek probatu ahal izateko.

Hala, atzo bertako kideek azaldu zutenez, lehenengo kanpainaren bidez, horrelako bi ibilgailu bi astez maileguan uztea planteatzen da, 12 partikularri edo enpresa eta entitateetako kideei. Udaletik azaldu zutenez, "gainera, karga-bizikletak mailegatzeko zerbitzu bat jarriko da abian, VGBiziz sareko edozein erabiltzailek baliatu ahal izango duena. Bi karga-bizikleta izango dira eskuragarri, edonorentzat. Bizikleta bana, hain zuzen ere, Hedegile kalean eta autobus-geltokian. Sei hilabeteko proba pilotua izango da, ibilgailu horiek VGBiziz sarearen erabiltzaileen artean eskaririk duten jakiteko. Doakoa izango da".

Kanpainan parte hartzen dutenek, horrez gain, bide-hezkuntzako espezialista batek emango duen prestakuntza-ekintza bat jasoko dute. Era berean, ibilbide pertsonalizatu bat egingo da eta euren ohiko ibilbideetako batean lagunduko zaie. Bestalde, parte hartzen dutenek VGBiziz sarearen app-a instalatu eta erabili beharko dute, eta eguneroko erabilera amaitu ondoren VGBiziz aparkaleku seguruen sareko puntuetako batean aparkatu beharko dute bizikleta, baldin eta bizikleta gordetzeko espazio seguru bat ez badute.

BALDINTZAK Kargako bizikletak erabiltzeko gutxieneko adina 18 urtekoa izan behar da. Gainera, kargako bizikletak itzultzeko, hartu zireneko aparkaleku berean egin beharko da, eta egun berean. Bizikletek eraman dezaketen gehieneko zama 100 kilokoa da (gidatzen ari den pertsona kontuan hartu gabe).

"Horizon 2020 programako CityChangerCargoBike proiektu europarraren barneko ekimena da. Hiriguneetan karga-bizikletak eskala handian sartzea eta erabiltzea hirientzat oso ekintza onuragarria dela nabarmendu da", azaldu zuten Udaletik. "Bizikletaren bidezko mugikortasunaren irudiak hobera egiten du, joan-etorrietan erabiltzen dituzten pertsonen kopurua areagotu egiten da, hiri-espazioa modu eraginkorragoan erabiltzen da, eta airearen kalitatea, segurtasun-mailak eta bizi-kalitatea hobetzen dira. Hala ere, irtenbide berritzaile hori oso hiri gutxitan dago presente, eta, kasurik onenean, Europako hiri batzuetan, hasierako fasean".

Xehetasunez

Kanpainak. Bi kanpaina berri sei hilabetez. Gasteizko Udalak, Ingurumen Gaietarako Ikastegiaren bidez, bi kanpaina berri sortu zituen atzo hirian karga- bizikletak probatzeko. Gainera, berrikuntza gisa, mota horretako bi bizikleta jarriko dira. Sei hilabetez egongo dira erabilgarri, VGBiziz sareko edozein erabiltzailek probatu ahal izateko.

Esaldia. "Horizon 2020 programako CityChangerCargoBike proiektu europarraren barneko ekimena da", azaldu zuten atzo Gasteiko Udaletik.

noticias de noticiasdealava