- Helburu sendo eta indartsuak ditu gizarte batentzat: berdintza gisa bizitzea, askatasunean eta, izenak berak adierazten duen bezala, emakumeak beldurrik gabe bizi ahal izango diren gizarte bat eraikitzea. Emakunde Emakumearen Euskal Erakundeak bultzatuta, eta euskal erakunde guztiekin lankidetzan, hala nola Arabako, Bizkaiko eta Gipuzkoako Foru Aldundiarekin eta Eudelekin, atzo hasi zen Beldur Bariken 12. edizioa. Programaren aurkezpena atzo goizean egin zen, Jimmy Jazz aretoan. Kai Nakaik zuzenean aurkeztu zuen programarako sortutako Nahikoa dela abestia.

Hala, atzo hasi zen Gasteizen "gazteen arteko indarkeria sexista eta matxista prebenitzea" helburu duen lehiaketaren hamabigarren edizioa. "Beldur Barik lehiaketa programaren ekintza nagusietako bat da. Aurten Kai Nakai artista gasteiztarrak kantu bat sortu du Beldur Barik Jarrera sustatzeko, Nahikoa dela izenburupean. Berak iazko lehiaketan Gure Misioa hirugarren kategoriako aipamen berezia jaso zuen. Horrez gain, Uxue Bereziartua ilustratzaile feministak sortu du aurtengo irudia, berak Errebelazioa lanarekin ikus-entzunezko saria irabazi zuen", azaldu zuten Emakundetik. Gainera, biak izan ziren atzoko aurkezpenean. Ildo horretatik, bertatik gogorarazi zutenez, lehiaketa 12 eta 26 urte bitarteko gazteei zuzendua dago, eta adierazpen artistikoak saritzen ditu. "Lan horiek neska-mutilek ezberdintasun egoerei Beldur Barik jarrerarekin nola egiten dieten aurre erakutsi behar dute; alegia, errespetua, parekidetasuna, askatasuna eta autonomia, elkarkidetza eta indarkeria sexista eta matxistaren bazterketa irmoa adierazten dituzten jarrerekin", gaineratu zuten. Kultura matxista eta indarkeria sexistaren formak eraldatzeko konpromiso pertsonal eta kolektiboa islatu behar dute lanek. Aurreko edizioan bezala, lehiaketa honetara aurkezten diren bideoek hiru minutuko iraupena izango dute gehienez. Gainera, bideoan hitz eginez gero, azpitituluak gehitu beharko zaizkio gero, euskaraz zein gaztelaniaz. Bideoak aurkezteko epea irailaren 10etik azaroaren 5era izango da. Bestalde, aurten, parte-hartzeko hiru kategoria egongo dira: lehen kategorian, 12-13 urte bitarteko parte-hartzaileak izango dira; bigarren kategorian, 14-18 urte bitartekoak; eta hirugarrenean, 19-26 urte bitarteko gazteak. Urtero bezala, lehiaketan bakarka edo taldeka (ikastetxe bat, gela bat, elkarte bat...) parte hartu daiteke.

Guztira zortzi sari banatuko dira. Hauek izango dira: kategoria bakoitzeko 400 euroko saria eta 200 euroko aipamen berezi banatuko dira. Horrez gain, 300 euroko herri-bozkaketaren bitartez parte-hartze saria emango da. "Baita ikus-entzunezko ekoizpen onenari 300 euroko saria emango zaizkio. Kalitate artistikoari lan onenaren saria eta herri bozketan boto gehien lortu duen lanari ere saria emango zaio. Herri-bozketa azaroaren 11tik 12ra bitartean gauzatuko da, beldurbarik.eus web-gunearen bidez", azaldu zuten. Azkenik, aurten, azaroaren 26an jakinaraziko dira saritutako lanak Agurainen. Bertan, gazteentzako hainbat tailer dibertigarri antolatuko dira, eta hainbat euskal artista izango dira sari-banaketa girotzeko.

Halaber, Beldur Barik taldetik gogorarazi zuten lanek lehiaketaren helburuari erantzun behar diotela, hau da, indarkeria matxista eta sexista prebenitu behar dutela. Gainera, garrantzitsua da proposamenak originalak izatea.

Irizpideak. Bideo hau aurkezteko, lehenbizi ikus-entzunezko lana Youtube edo Vimeora igo behar da. Ondoren, web orrian dagoen formularioa bete behar da (www.beldurbarik.eus), eta ikus-entzunezko plataformaren aurretik igo den bideoaren esteka itsatsi. Formularioa bete ondoren, mezu bat agertuko da izen-ematea behar bezala egin dela baieztatuz. Lana lehiaketara emandakoan, programaren Idazkaritza Teknikoak lanak oinarri hauetan jasotzen diren baldintza guztiak betetzen dituela egiaztatuko du. Egiaztapenak egin ondoren, programaren Idazkaritza Teknikoak jakinaraziko du, lehiaketan egindako lana onartu den ala ez.

'Beldur barik'. Lehiaketa 12 eta 26 urte bitarteko gazteei zuzendua dago, eta adierazpen artistikoak saritzen ditu. Lan horiek neska-mutilek ezberdintasun egoerei Beldur Barik jarrerarekin nola egiten dieten aurre erakutsi behar dute; alegia, errespetua, parekidetasuna, askatasuna eta autonomia, elkarkidetza eta indarkeria sexista eta matxistaren bazterketa irmoa adierazten dituzten jarrerekin. Kultura matxista eta indarkeria sexistaren formak eraldatzeko konpromiso pertsonal eta kolektiboa islatu behar dute lanek.

Baldintzak. Edizio honetan, gehienez 3 minutuko iraupena dituzten ikus-entzunezko lanak aurkeztu ahal izango dira. Horrez gain, bideoetan hitz egiten bada gaztelerazko edo euskarazko azpitituluak jartzea derrigorrezkoa izango da. Bideoak aurkezteko epea irailaren 10etik azaroaren 5era bitartean zabalik egongo da. Parte-hartzeko hiru kategoria daude: lehen kategorian, 12-13 urte bitarteko parte-hartzaileak izango dira; bigarren kategorian, 14-18 urte bitartekoak; eta hirugarrenean, 19-26 urte bitarteko gazteak. Urtero bezala, lehiaketan bakarka edo taldeka (ikastetxe bat, gela bat, elkarte bat...) parte hartu daiteke.

Helburua. Beldur Barik taldetik gogorarazi zuten lanek lehiaketaren helburuari erantzun behar diotela, hau da, indarkeria matxista eta sexista prebenitu behar dutela. Gainera, garrantzitsua da proposamenak originalak izatea.