Emakunde Emakumearen Euskal Erakundeak herriko jaietan gizonen eta emakumeen arteko berdintasuna sustatzen duten euskal herrietan garatutako aldaketa-prozesuak aztertu ditu.Hori dela eta, Emakumeek Euskal Autonomia Erkidegoko tokiko jaietan parte hartzeko estrategiak ikerketa argitaratu du.
Bertan, bederatzi euskal herritan garatutako aldaketa-prozesuak aztertzen dira, jaietako eredu parte-hartzaileagoa eta berdinzaleagoa ekarriko duten estrategiak, gomendioak eta erronkak identifikatzeko, atzo Izaskun Landaidak, Emakundeko zuzendariak, ikerketaren sortzaileekin batera azaldu zuen bezala. Horrela, Gasteiz, Amurrio, Laudio, Bilbo, Berriz, Gernika, Donostia, Tolosa eta Antzuolako jaietan berdintasuna bermatzeko egin diren aldaketak aztertzen dituazterlanak, eta erakusten du jaietako balio, tradizio eta ohituren transmisioak ez duela aitzakia izan behar praktika "diskriminatzaileei eusteko". Ildo horretatik, IzaskunLandaida Emakundeko zuzendariak gogorarazi zuenez, "berdintasuna bermatzeko jaiak eguneratzea ezinbestekoa da justizia sozialari dagokionez eta horrela eskatzen dute emakumeek, mugimendu feministak eta gizarte osoak". "Margaret Bullen, Lidia Montesinos eta Begoña Pecharroman ikerlariek dokumentazio-lan sakona egin dute, eta jaien antolaketan eta berdintasunaren sustapenean parte hartzen duten pertsona askoren laguntza izan dute", gaineratu zuen.Bestalde, azterlana tokiko jaien kasuen azterketan oinarritzen da, lurralde bakoitzeko hiru herritako jaiak aztertu dira, eta bereziki nola ekin dioten egokitzapen-prozesu bati emakumeen eta gizonen berdintasunezko parte-hartzea ahalbidetzeko. "Espero dugu ikerketa honetan jasotako esperientziak pizgarri izatea beste herri batzuek ere jaiak gure garaiko errealitate sozialera egokitzeko aukera izan dezaten".
