Atxilotuta lokutorio bateko jabeari ustez erasotzeagatik

24 urteko gazte batek ustez kristal batekin eraso egin dio biktimari, mugikorra saltzerik izan ez duelako

06.10.2020 | 00:20
Gasteizko Udaltzaingoaren artxiboko-irudia. Argazkia: Alex Larretxi

GASTEIZ – Lokutorio batean sartu zen telefono mugikorra saltzeko asmoz, eta azkenean atxilotu egin zuten lokutorioaren jabeari kristal batekin ustez eraso egiteagatik.

Gasteizko Udaltzaingoak 24 urteko gazte bat atxilotu zuen larunbat goizean, Koroatze auzoko lokutorio bateko jabeari kristal batekin eraso egitea egotzita. Gasteizko Udaleko Segurtasun Sailak atzo jakinarazi zuenez, erasoa larunbatean izan zen, 11:00ak aldera. Ordu horretan, Udaltzaingoak establezimendu batean istilu bat gertatzen ari zela jakinarazi zioten. Iritsi zirenean, agenteek egiaztatu zuten barrualdea desordenatuta zegoela, odol orbanekin nahastuta eta kristalezko mostradorea hautsita. Saltokiaren barruan, jabeak ebaki sakon bat zuen eskuan, eta, poliziaren bertsioaren arabera, azaldu zuen gazte bat mugikorra saltzen saiatu zitzaiola. Hala ere, antza denez, baldintza gehiegi jarri zituen, eta biktimak uko egin zion erosteko proposamenari. Horren guztiaren ondorioz, borroka bat hasi zuten eta kristalezko erakusmahaia hautsi egin zen. Kontatutakoaren arabera, ustezko erasotzaileak kristalezko pusketa haietako bat hartu eta lepoan eta aurpegian eraso egiten saiatu zen, baina lortu ez. Dena den, eskuan lesioak eragin zizkion. Ihes egin ostean, lekuko batek ustezko erasotzaileari jarraitu zion eta, horri esker, udaltzainek harrapatu eta atxilotu ahal izan zuten. Igandean jarri zuten epailearen esku.

Beste gertakari batzuk Bestalde, udaltzainek espetxean sartzeko errekisitoria zuen 37 urteko gizonezkoa atxilotu zuten larunbat arratsaldean. Zirkulazio-istripu batean inplikatuta egon ostean, udaltzainek egiaztatu zuten gizonezkoak ez zuela gidabaimenik indarrean gidabaimena kendu ziotelako punturik ez zuelako. Amaitzeko, udaltzainek igande goizaldean, Errege Atea kalean egindako esku-hartzearen baitan, 21 urteko gizonezko bat atxilotu zuten autoritate-agenteen aurkako atentatua, erresistentzia eta desobedientzia delituen ustezko egilea izateagatik.

Gainera, Gasteizko suhiltzaileek ere sute bat itzali zuten joan den larunbatean, Santo Tomas plazan, abandonatutako arma fabrika batean. Suak bulegoko material ugari erre zituen. Poliziak ikerketa zabalik du oraindik, sutearen arrazoiak eta jatorria argitzeko.