- Eusko Jaurlaritzako Ingurumen, Lurralde Plangintza eta Etxebizitza Saila 5.039 familiarekin jarri da harremanetan gutun baten bidez, etxebizitzarako eskubide subjektiboa aitortzeko baldintzak betetzen dituztela jakinarazteko eta hori eskatzeko izapideen berri emateko. Iñaki Arriolak zuzentzen duen sailak azaldu duenez, Etxebiden izena emanda dauden eta legeak ezarritako baldintzak betetzen dituzten pertsonak dira, baina oraindik ez dutenak tramitatu: "Etxebiden inskribatuta dauden, eta legeak planteatutako eskakizunak betetzen dituzten arren oraindik izapiderik egin ez duten pertsonak dira", adierazi zuten Eusko Jaurlaritzatik.

Hala, Etxebizita Sailak azaldu duenez, etxebizitza duin eta egoki bat legez okupatzeko eskubide subjektiboa aitor dadin, hainbat baldintza bete behar dira: adinez nagusia edo adingabe emantzipatua izatea eta etxebizitzarik ez izatea; etxebiden alokairuko etxebizitza babestuaren eskatzaile gisa erregistratuta egotea, gutxienez lau urteko antzinatasunarekin; eta honako muga hauen arteko urteko diru-sarrerak izatea: Hiru kide edo gehiagoko bizikidetza-unitateak: 15.000 eurotik beherako urteko diru-sarrera haztatuak. Bi kideko bizikidetza-unitateak: 12.000 eurotik beherako urteko diru-sarrera haztatuak. Kide bateko bizikidetza-unitateak: 9.000 eurotik beherako urteko diru-sarrera haztatuak.

"Aste honetan banatzen hasi den jakinarazpenean, gainera, aitorpena izapidetzeko zer urrats egin behar dituzten eta fisikoki eta telematikoki non aurkeztu behar duten jakinarazten zaie hartzaileei. Gutun guztiek dagokion eskaera dute txertatuta. Lurraldearen arabera, 5.039 jakinarazpenak honela banatuta daude: 598 Arabakoak dira, 3.109 Bizkaikoak eta 1.332 Gipuzkoakoak", jakinarazi dute eta, hori esan ondoren, erantsi zuten: "Eskubide subjektiboa aitortzeak alokairu-erregimeneko etxebizitza bat esleitzea edota, etxebizitza eskuragarririk ez badago, alokairu pribatua ordaintzeko prestazio ekonomiko bat (gehienez 250 eurokoa hilean) eskuratzea. Prestazio hori xede horretarako baino ez da erabili behar".

Ez da Etxebizitza Sailak horrelako komunikazioak egiten dituen lehen aldia. 2019ko apirilean, 2.860 gutun bidali zitzaizkien Etxebiden izena emanda zeuden beste hainbati, eskubidea zutela gogorarazteko, eta, aurreko urtean berriz, 4.450 pertsonari jakinarazi zitzaien. Bestalde, Eusko Jaurlaritzaren hitzetan, "etxebizitzaren Legea abian jarri zenetik, 4.712 familiari aitortu zaie eskubide subjektiboa Euskadin. Haietatik, 918 Arabakoak dira, 3.228 Bizkaikoak eta 566 Gipuzkoakoak".

+18

18 urte baino gehiago edo adingabe emantzipatua izatea da baldintzetako bat.