Prostituzio eskaerak aurrera jarraitzen du, koronabirusari beldurra izan arren

Gizarterako elkarteak emakumeei laguntzen jarraitzen du, egoera honen aurrean dituzten arazoei aurre egiteko

27.03.2020 | 01:26
Prostituzioa eskatzen duten gizonen testigantzak, Gezurrak eta errealitatea erakusketan.

GASTEIZ – Koronabirusa izateko beldurrak eta Gobernu zentralak ezarritako alarma-egoerak ez dute Araban prostituzioa geldiarazi. Izan ere, bere eskaerak, aurrera jarraitzen du Gizarterako elkarteak egunkari honi helarazi dionez. "Arabako prostituzioaren benetako egoera zein den jakiteko pornografia eskatzen den iragarki-orriak jarraitzen ditugu. Hori dela eta, hirian prostituzio-eskaria dagoela egiaztatu ahal izan dugu. Eta noski, eskaria egonez, zerbitzua ere badago".

Esaldia Sandra elkarteko gizarte langilearena da. Eta gaineratzen du: "Ez zait gustatzen eemakumeek prostituzioan jarraitzen dutela esatea, ez dakigulako emakume horien egoera zein den. Beraiek ez dute horretan jardun nahi, baina horietako askok ez dute beste aukerarik izaten. Gainera, etorkinak izaten dira, haien familiak elikatu behar dituzte, eta prostituzio bidea baino ez dute aurkitzen. Nahiago dut nabarmentzea emakume horiek prostituzioan jarduten badute oraindik ere zerbitzu horiek eskatzen dituzten gizonak daudelako dela".

Eta, esan bezala, prostituzio eskariak bere horretan jarraitzen duenez, badira lanean jarduten duten emakumeak ere, lanean ari diren bitartean koronabirusaz kutsatzeko arriskua duten arren. Beldurrez egiten dute lan, Gizarterakotik azaldu dutenez, baina askotan emakume horiek ez dute beste irtenbiderik aurkitzen fakturak ordaintzen jarraitzeko eta janaria erosi ahal izateko. Izan ere, laguntza eske elkartearekin harremanetan jartzen diren emakumeen dei kopurua handitzen ari da azken egun hauetan: "Euren egoera ekonomikoari irteera bat eskatuz deitzen digute batez ere, edo jateko ere ez dutelako, eta horregatik janaria ere eskatzen digute", dio Sandrak. Alabaina, irabazten duten diru guztia lan egiten duten gelaren alokairua ordainduta edo familia zaintzeko gastatzen dute, eta ez dira aurrezteko gai. Horregatik, "orain ekonomikoki oso gaizki pasatzen ari dira", zehaztu du. Hainbeste non batzutan egunean hamar dei jasoten duten elkartetik: "Ez da lan erraza, baina emakume horiei ahal dugun guztian laguntzen saiatzen gara, eta bakarrik senti ez daitezen ere laguntzen diegu".

ETXEETAN Estatu osoan alarma egoera eta itxialdi agindua jarri ondoren, klubek beraien instalazioak itxi behar izan dituzte eta emakumeen zerbitzua eskaintzeari utzi diote. Orain, ordea, egiten ari den prostituzio guztia, bereziki, etxeetan egiten da, elkartetik zehazten duten moduan. Lan hori emakumeen etxean bertan egiten dute, edo, beste batzuetan, eskaera egin duten gizonen etxebizitzetara ere joaten dira. Hala ere, etxebizitza batean zein bestean arriskua handia da. Horregatik, koronabirusa zer den, nola hedatzen den eta berarengandik nola babesten den zehatz-mehatz azaltzen saiatzen dira elkartetik. Kutsatuta egonez gero zer egin ere jakinarazten diete. "Emakume horietako askok ez dute ulertzen inguruan gertatzen dena; are gehiago, batzuek hizkuntza ere, ez dute ulertzem eta, noski, beldur dira. Horregatik, egun hauetan, emakumeek deitzen ez didatenean, nik deitzen diet galdetzeko zer moduz dauden, gutxienez, animatzeko", adierazten du langileak.

Hala ere, emakume horiek jasaten duten beldur hori ez da bakarrik Gasteizko koronabirusarengatik, baizik eta beren herrialdeko egoerarengatik ere; izan ere, Kolonbiatik edo Venezuelatik datozen emakume horietako asko, adibidez, jakitun dira beren familiak ere kutsatzeko arriskuan daudela han. "Egoera horietan denok nahi dugu gure familiarekin egon, ondo daudela jakin, eta zerbaitek huts egiten badu, osasungintzak babestuko gaituela jakitea. Hala ere, emakumeek bakarrik daude hemen, beren familia nola dagoen edo koronabirusa uzkurtuko duten jakin gabe".

GIZARTERAKO Gizarterako beti saiatu da kolektibo zail baten hurbileko baliabidea izaten, jarduera horrek – prostituzioa – berekin dituen ezaugarriengatik, inguratzen duen estigma sozialari eta talde gisa duen artikulazio faltari dagokienez. "Gaur egun, fenomenoa konplexuagoa da, estuki lotuta baitago legez kanpoko immigrazioarekin eta sexu-esplotaziora bideratutako pertsonen salerosketa-arriskuarekin, eta, horrela, haien zaurgarritasuna areagotzen da", diote elkartetik.

Irabazi-asmorik gabeko elkarteak, 1986. urteaz geroztik laguntza, aholkularitza, orientazioa, informazioa eta prestakuntza ematen ditu artatutako emakumeekin esku hartzeko, haien gizarteratzea eta bizitza duina lortzen laguntzeko azken helburuarekin. Herritarrak sentsibilizatzera eta problematikari buruzko masa kritikoa sortzera bideratutako beste ekintza mota batzuk ere ezartzen dira, emakumeen benetako egoera ikusarazteko eta konponbide posibleekin inplikatzeko.

"Emakumeek ez dute horretan jardun nahi, baina horietako askok ez dute beste aukerarik aurkitzen"

"Emakume horietako asko etorkinak dira eta haien familiak elikatu behar dituzte"

saNDRA

Gizarterako elkartearen langilea