Zinebi Bilboko Dokumentalen eta Film Laburren Nazioarteko Jaialdiak 66. edizioaren irudia aurkeztu du. Cuchillo estudioak sortu du, zinema dokumentalaren sustraietan oinarrituta eta Dziga Vertov generoaren aitzindari handienetako bat eta 'kino-glaz'(zine-begi) kontzeptua ardatz hartuta. Bilboko Udalak antolatutako jaialdia azaroaren 8tik 15era ospatuko da.
"Begia funtsezko elementua da Zinebiren 66. edizioko kartelean, eta zinemak behatzeko eta sortzeko duen gaitasuna sinbolizatzen du, ikuslea errealitateari ikuspegi kritiko eta eraldatzaile batetik begiratzeko gonbidatuz", azaldu dute antolakuntzatik.
Bere benetako izena Denis Arkadievitch Kaufman zuen Dziga Vertovek gidoirik, tramarik edo aktorerik gabeko zinema defendatu zuen, kamerak giza begiak baino gehiago errealitatea modu objektiboan atzeman zezakeelakoan. Berarentzat, zinema ez zen artea bakarrik, gizartea eraldatzeko tresna indartsua baizik.
Bere lanik ezagunenetakoa Kameradun gizona da, 1929koa, Ukrainako Kiev hirian oinarritutako sinfonia urbanoa, teknika eta esperimentazio zinematografikoaren uztarketa berritzaile baten bidez eguneroko bizitza aztertzen duena.
Zinebiren aurtego irudiaren egilea Cuchillo sormen estudioa izan da. Bilbon du egoitza eta 2015ean sortutako estudio independentea da, identitatean eta diseinu interaktiboan espezializatua. Nazioartean aintzat hartuak izan diren "denboraz kanpoko proiektuak" lortu ditu, betiere diseinuaren, teknologiaren eta sormenaren batuketaren bidez ingurune digitala eraldatzeari begira.
Bere ibilbidean zehar, Bilboko estudioak 17 ADG Laus sari eta zazpi Site of the Day sari jaso ditu, eta bost aldiz izendatu dute Urteko Estudio lehiaketa berean.
