Elena Martinez de Madina filologo eta ikertzaileak irailaren 10ean jasoko du 2023ko Urrezko Zeledon saria, Europa biltzar jauregian, Gasteizko Udal Musika Banda lagun duela. Maria de Maeztu auditoriumean izango da ekitaldia, eta Gasteizko Udal Txistulari Bandak ere parte hartuko du, Iker Olazabal Udal Musika Bandako zuzendariondokoa gidari dela.
Sonia Diaz de Corcuera Gasteizko Udaleko Kultura eta Hezkuntza zinegotziak astearte honetan adierazi duenez, "Elena Martinez de Madina filologo eta ikertzaile ezaguna da, eta 20 urte baino gehiago daramatza onomastikan eta, zehatzago, Gasteizko toponimian lanean. Sari honek hiriaren eta Arabaren irudia hobetzen laguntzen duten pertsona horien lana aitortu nahi du".
Horrela, ziurtatu du Martinez de Madinak "ondo merezia" duela Urrezko Zeledon saria, "bere lan profesionalagatik eta Arabako gizartean duen inplikazioagatik". "Gainera, ez zait bururatzen sari hau jasotzeko modu hoberik udal musika eta txistulari banden musikaz lagunduta baino. Arrakasta izateko osagai guztiak dituen gala izango da", gaineratu du.
Gainera, lehen aldiz saria ez da gizon batekin partekatuko. Josemari Velez de Mendizabal Urrezko Zeledonen presidenteak azaldu duenez, "aurten ere Urrezko Zeledonaren banaketak berrikuntza garrantzitsuak dakartza. Alde batetik, emakume bat, Elena Martínez de Madina, lehen aldiz, gizon batek lagundu gabe igoko da oholtzara saria jasotzera. Eta alderdi artistikoari dagokionez, Udal Musika Bandak primizia aipagarriak dituen programa bat prestatu du".
