Arabako Foru Aldundiko Mugikortasun Jasangarriaren eta Bide Azpiegituren Sailak 3,5 milioi euro inbertituko ditu datozen hilabeteetan lurraldeko 71 errepidetako zenbait tarteren zorua hobetzeko. 2024ko Bide Zoruen Planean jaso denaren arabera, esku hartzeak egingo dira Lehentasunezko Intereseko Sareko eta Oinarrizko Sareko bide nagusietako batzuetan, hala nola A-1, N-124, AP-1 eta N-622 errepideetan, obra gehien bigarren mailako bideetan egingo diren arren.
Jon Nogales Mugikortasun Jasangarriaren eta Bide Azpiegituren foru diputatuak aurkeztu du ostegun honetan 2024ko Bide Zoruen Plana, eta inbertsio ahalegina "Arabako errepideen segurtasuna hobetzeko" politika publikoen barruan kokatu du. "Inbertsio hauek behar bezala planifikatzeak aukera emango digu, gainera, diru kutxa publikoei dirua aurrezteko epe ertain eta luzera, galtzada gehiago hondatzea saihestuko baita", gaineratu du.
Bide Zoruen Planak lurraldeko eskualde guztietako 71 errepidetan esku hartzea aurreikusi du, denboraren, elurraren eta izotzaren ondorioz zuloak, pitzadurak eta deformazioak dituzten bide tarteak eta gune zehatzak konpontzeko. Bide zati osoak fresatu eta beroan aglomeratutako asfaltozko errodadura geruza birjarriko da kasu batzuetan, eta gune jakin batzuetan beste batzuetan, eta hartxintxarrezko ureztatzeen tratamenduak aplikatu ondoren.
Esku hartu beharreko errepideen zerrendan, Lehentasunezko Intereseko Sarearen eta Oinarrizko Sarearen bide nagusietako batzuk daude, baina jarduketa gehienak eskualde, toki eta auzo mailako sareetan egingo dira. "Oso garrantzitsua da Arabako eskualdeak elkarren artean komunikatzen dituzten eta herrigune txikietara bide ematen duten errepideak mantentzea, lurraldea egituratzeko eta landa ingurunean bizi direnei kalitatezko zerbitzu publikoak emateko", esan du Nogalesek.
Ildo horretan, inbertsio programaren aurrekontuaren %40 baino gehiago bigarren mailako errepideen zorua hobetzeko erabiliko dutela zehaztu du foru diputatuak.
